ABŞ Moskvanın Avropa İttifaqı missiyasına qarşı tənqidlərini qəbul etmir

Bakı/27.01.23/Turan: Cümə axşamı Vaşinqton Rusiya Xarici İşlər Nazirliyinin Avropa İttifaqının Ermənistan-Azərbaycan sərhədində vəziyyətin monitorinqi üzrə mülki missiyasına qarşı ittihamlarını rədd edib və bu missiyanı dəstəkləyib, Turan-ın Vaşinqton müxbiri bildirib.

“Biz tərəfdaşların, o cümlədən Avropa İttifaqının regionda etimadın yaradılması və Ermənistanla Azərbaycan arasında birbaşa dialoqa şərait yaradılması üzrə səylərini alqışlayırıq”, - Dövlət Departamentinin rəsmi nümayəndəsi Vedant Patel brifinqdə Turan-ı suallarını cavablandırarkən deyib.

Onun sözlərinə görə, ABŞ Ermənistanla Azərbaycan arasında sülh danışıqlarına sadiqdir. “Biz bütün tərəfdaşlarımızla, eləcə də regiondakı tərəfdaşlarımızla sıx işləməyə davam edirik”, - o deyib.

Cümə axşamı Rusiya Xarici İşlər Nazirliyi bildirib ki, Avropa İttifaqının missiyası "regionda geosiyasi qarşıdurmanı ancaq qızışdıracaq və mövcud ziddiyyətləri daha da dərinləşdirəcək". O, Avropa İttifaqını Rusiyanın hesabına regionda öz təsirini genişləndirməyə çalışmaqda ittiham edib.

Turan-ın “Rusiya regionda sülhməramlı yoxsa və sabitliyi pozan kimi hərəkət edib?” sualına cavabında Patel xatırladıb ki, ABŞ 2020-ci il noyabrın 10-da Rusiyanın vasitəçiliyilə Ermənistan və Azərbaycan arasında əldə edilən və Rusiya sülhməramlılarının yerləşdirilməsinə səbəb olan atəşkəs sazişinin bağlanmasında iştirak etməyib, "ona görə də bununla bağlı heç nə deyə bilmərəm". 0