ABŞ öz vətəndaşlarını Azərbaycan və Ermənistana səyahət etməməyə çağırıb

Bakı/19.05.21/Turan: “COVID-19 səbəbilə Azərbaycana səyahət etməyin. Terrorizm narahatlığı səbəbindən səyahətə yenidən baxın”. Bu xəbərdarlıq ABŞ Dövlət Departamentinin saytında yerləşdirib. Xəbərdarlıqda Dövlət Departamenti öz ölkəsinin vətəndaşlarına Azərbaycana və Ermənistana səyahət etməməyi tövsiyə edib.

ABŞ Azərbaycanla bağlı səyahət məsləhətlərini ən yüksək - 4-cü səviyyəyə (qırmızı) qaldırıb və vətəndaşlarına səyahət etməməyi tövsiyə edib.

Dövlət Departamenti xəbərdarlığa səbəb kimi koronavirus və sərhəddəki gərginliyi, terror təhlükəsini göstərib. Buna görə də Azərbaycan-İran sərhəddinə də lazımsız səyahətlərdən çəkinmək tövsiyə olunur.

“Azərbaycana uzun müddətdir mümkün terror hücumları planlaşdıran terorçu qruplar tərəfindən risklər qalmaqdadır.  Bu səbəbdən Azərbaycan-İran sərhəddinə lazımsız səyahətlərdən çəkinin. Terroristlər heç bir xəbərdarlıq etmədən belə hücum edə bilər, turizm yerlərini, nəqliyyat mərkəzlərini, bazarları/ticarət mərkəzlərini, yerli idarəetmə obyektlərini, otelləri, klubları, restoranları, ibadət yerlərini, parkları, böyük idman və mədəni tədbirləri, təhsil müəssisələrini, hava limanlarını və digərlərini hədəf ala bilərlər”.

Həmçinin xəbərdarlıqda Dağlıq Qarabağa getməmək tövsiyə olunub. Bildirilir ki, giriş məhdudlaşdırıldığı üçün ABŞ hökuməti Qarabağ və ətraf ərazilərdə ABŞ vətəndaşlarına təcili yardım göstərə bilmir.

“Azərbaycanın Ermənistanla sərhəddinə yaxın yollarda ehtiyatlı olun. Yolun bəzi hissələrinin xəbərdarlıq edilmədən beynəlxalq sərhədləri keçə biləcəyinə diqqət yetirin. Yollar nəzarət məntəqələri tərəfindən idarə oluna bilər və ya xəbərdarlıq edilmədən səyahətçilər üçün bağlana bilər”.

ABŞ Dövlət Departamenti Ermənistana səyahətlə bağlı da oxşar xəbərdarlıq edib.

Xatırladaq ki, 2020-ci il sentyabrın 27-də Dağlqı Qarabağda başlayan aktiv döyüş əməliyyatlarından öncə də ABŞ Dövlət Departamenti xəbərdarlıq yaymışdı. -16D-