ABŞ qlobal korrupsiyaya qarşı mübarizə üzrə aparıcı məmur təyin edib

Vaşinqton/06.07.22/Turan: Çərşənbə axşamı Dövlət Departamenti sanksiyalar üzrə aparıcı ekspert Riçard Nevyunu qlobal korrupsiyaya qarşı mübarizə üzrə yeni koordinator təyin edib, bu barədə Turan-ın Vaşinqtondakı müxbiri məlumat verib.

"Bu təyinat ABŞ-ın milli təhlükəsizliyin əsas elementi kimi korrupsiyaya qarşı mübarizəyə verdiyi əhəmiyyəti göstərir və bu mübarizədə qlobal tərəfdaşlığı təsdiq edir", deyə Dövlət Departamentinin nümayəndəsi Ned Prays bildirib.

O, çərşənbə axşamı keçirilən brifinqdə bildirib ki, Nevyunun vəzifəsi "ona və komandasına ABŞ hökumətinin antikorrupsiya sahəsində fəaliyyətini gücləndirmək, həmçinin korrupsiyaya qarşı mübarizə sahəsində beynəlxalq tərəfdaşlarla əməkdaşlıq etmək həvalə ediləcək".

Riçard Nevyu bundan əvvəl Dövlət Departamentində İran üzrə xüsusi nümayəndə, sanksiya siyasəti üzrə koordinator müavini və Milli Təhlükəsizlik Qərargahında İran üzrə bölmənin direktoru vəzifəsində işləyib.

Turan-ın Dövlət Departamentinin bu yaxınlarda xarici dövlətlərin səfirliklərinə göndərdiyi dissidentlərə qarşı transmilli repressiyalarla bağlı diplomatik notası haqqında sorğusuna cavabda Ned Prays belə deyib:

"Bu, bizim bütün dünyada paytaxtlara, habelə Vaşinqtondakı səfirliklərə hər zaman verdiyimiz mesajdır. Transmilli repressiyalar, o cümlədən müxtəlif ölkələrdə, eləcə də ABŞ-da dissidentlərə qarşı repressiyalar. Ədliyyə Nazirliyi bu işlərdən bəzilərinə diqqət çəkib, onlar bizi dərindən narahat edir". 25B