ABŞ Rusiyanı "öz niyyətini aydınlaşdırmağa" çağırır

Çərşənbə günü ABŞ Rusiyanın regiondakı öz ərazi sularının sərhədlərini yenidən nəzərdən keçirə biləcəyinə dair  xəbərlərə ehtiyatla reaksiya verib, Turan-ın Vaşinqton müxbiri bildirib.

Kremlin dəstəklədiyi bəzi KİV-in bildirdiyi təkliflər layihəsində Rusiya Müdafiə Nazirliyi, görünür, öz materik sahilində və Baltik dənizi adalarındakı ərazi suları zolağını ölçmək üçün istifadə olunan koordinatların yenilənməsini təklif edir.

Qərar layihəsi (müəllifi Müdafiə Nazirliyidir) çərşənbə axşamı Rusiya Federasiyası hökumətinin hüquq portalında yerləşdirilib, lakin sonradan silinib. Layihədə deyilir ki,  mövcud dəniz sərhədinə yenidən baxılması lazımdır, çünki  1985-ci ildə istifadədən çıxmış dəniz xəritələri əsasında müəyyən edilib.

"Biz mesajları gördük və vəziyyəti diqqətlə izləyirik", - çərşənbə günü Dövlət Departamentinin nümayəndəsi Turan-ın Vaşinqton müxbirinə bildirib.

“Biz Rusiyanı öz niyyətini aydınlaşdırmağa və onun beynəlxalq hüquqa və mövcud sazişlərə uyğun olmasını təmin etməyə çağırırıq”,- Dövlət Departamentinin nümayəndəsi əlavə edib.

Təklif olunan dəyişikliklərin sərhəd dəyişikliyinə səbəb olub-olmayacağı və ya, sadəcə, dəqiqləşdiriləcəyi Rusiya layihəsindən dərhal aydın olmayıb.

Bu plan Moskvanın qonşularının narazılığına səbəb olub. "Rusiyanın hərəkətləri qonşu ölkələri və onların cəmiyyətlərini qorxutmaq məqsədilə qəsdən, məqsədyönlü, eskalasion təxribat kimi qəbul edilir", - çərşənbə günü səhər Litva Xarici İşlər Nazirliyi bildirib.

"Bu, Rusiyanın təcavüzkar və revizionist siyasətinin qonşu ölkələrin və bütövlükdə Avropanın təhlükəsizliyinə təhdid yaratdığına daha bir sübutdur", - bəyanatda deyilir.