ABŞ Rusiyanı Ukraynada eskalasiyadan çəkindirir

Vaşinqton/25.10.22/Turan: Rusiya Ukraynanın öz ərazisində qondarma “çirkli bomba”dan istifadə etməyi planlaşdırdığını iddia edərkən, ABŞ rəsmi şəxsləri bu ittihamların saxta olduğunu vurğulamaqda davam edirlər, belə ki,  Rusiya növbəti təcavüzünə haqq qazandırmaq üçün bunu edir, Turan-ın Vaşinqtondakı müxbiri bildirib.

“Biz Kremlin bu cür dezinformasiyasından narahatıq, çünki Moskvanın xidməti sənədi barədə və bu cür bəyanatlardan sonra nələrin baş verdiyini bilirik”, - bazar ertəsi Dövlət Departamentinin nümayəndəsi Ned Prays deyib.

“Biz Ukraynanın öz ərazisində “çirkli bomba” tətbiq etməyə hazırlaşması barədə qəsdən yalan iddianı rədd edirik”, - o əlavə edib.

Vaşinqton güman edir ki, Moskva bu ittihamlardan Ukraynada eskalasiya üçün bəhanə kimi istifadə etmək niyyətindədir.

Bazar ertəsi dövlət katibi Entoni Blinken Ukraynanın xarici işlər naziri Dmitri Kuleba ilə iki dəfə danışıb. “Dövlət katibi Rusiyanın davam edən təcavüzü və “çirkli bomba” ritorikası qarşısında ABŞ-ın dəyişməz dəstəyini təsdiqləyib.

Öz növbəsində ABŞ-ın müdafiə naziri Ostin Ukraynanın müdafiə naziri Reznikovla danışıb və təsdiq edib ki, ABŞ “Rusiyanın Ukraynaya qarşı qanunsuz müharibəni daha da genişləndirməyə haqq qazandırmaq üçün açıq və yalan ittihamlarını rədd edir”.

Bazar ertəsi ABŞ Birləşmiş Qərargah Rəisləri Komitəsinin sədri Milli  rusiyalı həmkarı ilə ayrıca danışıb. Tərəflər bir sıra təhlükəsizlik məsələlərini müzakirə ediblər və əlaqə xətlərini açıq saxlamaq barədə razılığa gəliblər, Pentaqon bildirib.

Kiyevin iştirakı olmadan Moskva ilə heç bir şeyi müzakirə etməməklə bağlı ABŞ-ın siyasətində hər hansı dəyişikliyin olub-olmaması barədə Turan-ın müxbirinin  sualının cavabında  Dövlət Departamentinin nümayəndəsi deyib ki, ABŞ bütün hərəkətlərini Kiyevlə razılaşdırır. 025B