ABŞ Rusiyaya Ukraynada vəziyyətin nizamlanması ilə bağlı variant təklif edib

Barak Obama Vladimir Putinə Ukraynada böhranın nizamlanması variantını təklif edib və sutka ərzində ikinci dəfə Rusiya prezidentini qoşunları Ukrayna sərhədindən çıxarmağa çalışıb. “Exo Moskvı” radiosu məlumat verir.

Obama gecə telefon söhbəti zamanı Putinə Ukrayna ilə bağlı bəzi təkliflər verib. Təkliflərin mahiyyəti gizli saxlanılır. Amerika administrasiyasının yüksək vəzifəli nümayəndəsi jurnalistlərə bildirib ki, bu mərhələdə ABŞ təfərrüatları açıqlamayacaq. O yalnız dəqiqləşdirib ki, sənəd təkliflərin “geniş konsepsiyası” əhatə edir.

Kremlin mətbuat xidmətindən bildirilib ki, Vladimir Putin və Barak Obama Ukrayna böhranı ilə əlaqədar fikir mübadiləsini davam etdiriblər. “Şərtləşdik ki, yaxın vaxtlarda Rusiya və ABŞ xarici siyasət idarələrinin rəhbərləri bu cür birgə işin konkret parametrlərini müzakirə etsinlər”.

Obama yenidən Putini qoşunları Ukrayna sərhədindən geri çəkməyə və ölkənin suverenliyi ilə bağlı hər hansı addımın atılmasına yol verməməyə çağırıb.

Telefon söhbəti Vladimir Putinin təşəbbüsü ilə baş tutub və bir saata yaxın davam edib. -02D-