ABŞ səfiri hakimiyyəti vətəndaşlarla dialoqa və onların hüquqlarına hörmət etməyə çağırır

ABŞ-ın Bakıdakı səfirliyinin saytında səfir Riçard Morninqstarın Azərbaycanda son hadisələrlə bağlı bəyanatı yerləşdirilib.

“Biz İsmayıllıda əmlakın məhv edilməsi, o cümlədən şəxsi otelin və icra hakimiyyəti binasının yandırılması ilə nəticələnən 24 yanvar iğtişaşları barədə məlumatları oxuduq. Yanvarın 26-da polis Bakıda İsmayıllı sakinlərinə dəstək nümayişini dağıtdı və aksiyanın onlarca iştirakçısı saxlanıldı.

Bundan əvvəl də Bakıda iki etiraz aksiyası – ticarətçilərin hüquqlarının pozulasına və icarə haqqının artırılmasına qarşı və orduda əsgər ölümlərinə qarşı etiraz aksiyası keçirilib.

Bir sıra hallarda hakimiyyətin nümayişçiləri dağıtmaq üçün gözyaşardıcı qazdan və rezin güllələrdən istifadə etdiyi bildirilib.

İsmayıllıda zorakılığa görə təəssüf edirik və eyni zamanda qanuni iradlara cavab məqsədilə Azərbaycan hökuməti və vətəndaşalrı arasında ciddi dialoqa və hakimiyyəti vətəndaşların toplaşmaq və fikirlərini ifadə etmək azadlığına hörmət etməyə çağırırıq”, deyə səfirin bəyanatında deyilir. -02D-