ABŞ səfirliyi Hilal Məmmədovun işini təqib edir

Dünən “Tolışi sədo” qəzetinin həbsdə olan redaktoru Hilal Məmmədovun hüquqlarını müdafiə komitəsinin üzvləri ABŞ səfirliyinin siyasi məsələlər üzrə müşaviri Cef Kurgenlə görüşüblər.

İki saatlıq söhbətdə komitənin həmsədrləri - hüquq müdafiəçisi Arzu Abdullayeva və “Tolışi sədo” qəzetinin baş redaktoru Rafiq Cəlilov, habelə vəkil Ramiz Məmmədov Amerika diplomatına H.Məmmədovun işi haqqında məlumat veriblər.

Diplomat H.Məmmədovun saxlanması və üzərində axtarış zamanı yol verilən pozuntular, həmçinin onun cinayət təqibinə məruz qalmasının səbəbləri və ittihamların qondarma olması barədə məlumatlandırılıb. Komitə üzvlərinin iddiasına görə, H.Məmmədov jurnalist və hüquq-müdafiə fəaliyyətinə görə həbs edilib. Komitə üzvləri hesab edir ki, beynəlxalq ictimaiyyət H.Məmmədovu “vicdan məhbusu” kimi tanımalıdır.

Kurgen öz növbəsində .Məmmədovun məsələsinin səfirliyin diqqətində olduğunu və bundan sonra da bu məsələni diqqətdə saxlayacaqlarını bildirib.

* “Tolışi sədo” qəzetinin baş redaktoru və Talış Mədəniyyət Mərkəzinin sədr müavini Hilal Məmmədov iyunun 21-də qanunsuz narkotik saxlamaq ittihamı ilə həbs edilib. İyunun 4-də ona 274-ci (dövlətə xəyanət) və 283.2.2 maddə (milli, irqi, sosial və ya dini nifrət və düşmənçiliyin salınması) ilə yeni ittihamlar irəli sürülüb. 

Yerli və beynəlxalq demokratik ictimaiyyət qəti əmindir ki, Məmmədovu aktiv vətəndaş mövqeyi və hüquq müdafiəsi fəaliyyəti ilə əlaqədar təqib edirlər. 

Məmmədov İnternetdə populyar olan “Tı kto takoy? Davay, do svidaniya?” meyxana videoçarxının müəllifidir. -06D-