ABŞ senatorları Baydeni Azərbaycan da daxil olmaqla, bütün dünyada mətbuat azadlığına hücumların qarşısını almağa çağırırlar

Son bir neçə həftə ərzində Azərbaycan da daxil olmaqla, bütün dünyada mətbuat azadlığına vurulan zərbələr jurnalistikanı qorumaq tələbilə Bayden administrasiyasına təzyiqlərə səbəb olub, Turan-ın Vaşinqtondakı müxbiri bildirib.

Cümə axşamı Ben Kardin, Tim Keyn, Jeff Merkli, Brayan Şats və Kris Van Hollenin rəhbərliyilə bir qrup ABŞ senatoru Senata qətnamə təqdim edib. Qətnamədə bütün dünyada mətbuat azadlığına təhlükənin artmasından danışılır.

Mayın əvvəlində Ağ Ev elan edib ki, prezident Co Bayden mətbuat azadlığının sıxışdırılmasını "milli təhlükəsizliyə ciddi təhlükə" hesab edir və mətbuatı sıxışdıranlara qarşı sanksiyalar tətbiq edəcək.

Senatın "S. REZ. B 688" qətnaməsi Azərbaycan da daxil olmaqla, bir sıra ölkələrdə KİV azadlığına son hücumları əhatə edir.

Sənəddə deyilir: "Azərbaycanda 2024-cü ilin fevralında keçirilən rəqabətsiz seçkilərdə beşinci dəfə prezident olan İlham Əliyev hökuməti son aylarda müstəqil KİV-ə hücuma yenidən başlayaraq 10 jurnalisti saxlayıb.

Jurnalistləri Müdafiəsi Komitəsinin məlumatına görə, onlar "Abzas Media", "Kanal 13" və "Toplum"TV əməkdaşları, məhz Ülvi Həsənli, Sevinc Vaqifqızı, Məhəmməd Kekalov, Hafiz Babalı, Elnarə Qasımova, Nərgiz Absalamova, Əziz Orucov, Şamo Eminov, Ələsgər Məmmədli və Müşfiq Cabbardır. Bu, jurnalistlərə qarşı repressiya, məmurlar arasında korrupsiya barədə reportajlara görə qisasdır", - sənəddə deyilir.

Qətnamədə qeyd olunur ki, 2023-cü ildə dünyada 320 jurnalist həbs edilib.

Senatorlar prezident Baydeni və dövlət katibini mətbuat azadlığı məsələlərində ABŞ-ın liderliyini saxlamağa, amerikalı jurnalistlərə və digər ölkələrdə KİV nümayəndələrinə hücumda günahkar olanları məsuliyyətə cəlb etməyə çağırıblar.

Demokratik cəmiyyətlərin dəstəklənməsi, korrupsiyanın ifşa edilməsi və cəmiyyət üçün şəffaflığın təmin edilməsindən ötrü azad mətbuat zəruridir, senator Kardin deyib.

Senator Şats əlavə edib ki, adamlar öz icmalarında nələrin baş verdiyini və dünyanı anlamaq üçün jurnalistlərə güvənirlər. Öz növbəsində, jurnalistlər həqiqəti çatdırmaq üçün çox vaxt böyük şəxsi risklə inanılmaz səy göstərirlər. Təəssüf ki, biz Qəzzada, Rusiyada və digər ölkələrdə çoxlu sayda jurnalistin öldüyünü və həbs olunduğunu görməyə davam edirik.