ABŞ Şimali Koreya qoşunları haqqında məlumatlar fonunda Rusiyanın "düşüncəsiz" hərəkətlərini pisləyir

Çərşənbə axşamı Birləşmiş Ştatlar bildirib ki, KXDR-in müharibədə Rusiyanın tərəfində iştirak etmək üçün əsgər göndərməsi haqqında məlumatları "araşdırmağa davam edir". "KXDR-in əsgərlərinin Putinin Ukraynaya qarşı müharibəsinə qoşulacağı doğrudursa, bu, təhlükəli və həddindən artıq narahatedici hadisə olacaq", bu barədə Dövlət Departamentinin mətbuat katibinin müavini Vedant Patel brifinqdə bildirib.

Bazar ertəsi Britaniya hökuməti Şimali Koreyanın Rusiyanın Ukraynadakı müharibəsini dəstəkləmək üçün qoşun göndərməyə razılaşdığını açıqlayıb.

Çərşənbə axşamı keçirilən brifinqdə Patel Turan-ın müxbirinin suallarına cavabda bildirib ki, Vaşinqton daha konkret fikir bildirmək üçün ətraflı məlumata malik olmalıdır.

"Biz müttəfiqlərimiz və tərəfdaşlarımızla bu dramatik addımın nəticələri haqqında məsləhətləşmələri davam etdirəcəyik. Əlbəttə, doğrudursa, bu, həm Rusiya, həm də, əlbəttə ki, KXDR tərəfindən daha bir düşüncəsiz və təhlükəli hərəkət olacaq", deyə o, qeyd edib.