ABŞ Ukraynaya kaset hərbi sursatları verir

Vaşinqton/08.07.23/Turan: Cümə günü ABŞ prezidenti Co Bayden Ukrayna üçün 800 milyon dollarlıq böyük yardım paketini elan edib. Sövdələşməyə dövlət katibi Entoni Blinkenin dediyi kimi, ABŞ-ın əvvəllər Ukraynaya göndərmədyi "meydan hədəflərini vurmaq üçün yüksək effektli və etibarlı artilleriya texnikası" olan kaset sursatları daxildir", - Turan-ın müxbiri Vaşinqtondan bildirib.

Paketə həmçinin əlavə yüksək dəqiqlikli aviasiya hərbi sursatları, yaylım atəşli reaktiv sistemlər üçün döyüş sursatları, 155 millimetrlik haubitsalar, 155 millimetrlik və 105 millimetrlik artilleriya sursatları, hava hücumundan müdafiə sursatları, tank əleyhinə raketlər və reaktiv mərmilər, Bradley və Stryker daha zirehli avtomobilləri və Ukrayna ordusunu, onun savaş meydanındakı qüvvələrini möhkəmləndirmək üçün lazım olan digər avadanlıqlar daxildir, Blinken qeyd edib.

Milli təhlükəsizlik üzrə müşaviri Ceyk Sallivan və Pentaqon nümayəndəsi Kolin Kal ayrı-ayrılıqda jurnalistlərə müraciət edərək deyiblər ki, Ukraynada artilleriya çatışmazlığı olduğu üçün ABŞ dinc sakinlərə  risklə bağlı narahatlığa baxmayaraq, Kiyevin xahişini yerinə yetirməlidir. Bundan əlavə, onlar xatırladıblar ki, Rusiya artıq bu silahdan istifadə edib.

Ağ Evin məlumatına görə,  Kiyev artıq zəmanət verib ki, mülki şəxslərə dəyən ziyanı minimuma endirmək üçün ABŞ-ın verdiyi silahlardan 2,5 faiz və ya daha az partlamamış hərbi sursat əmsalı ilə istifadə edəcək.

2008-ci il müqaviləsinə əsasən kaset hərbi sursatları 123 ölkədə qadağan edilib. Rusiya, Ukrayna və ABŞ bu müqavilənin iştirakçısı deyil.

Aleks Raufoğlu