ABŞ Ukraynaya Rusiya ilə danışıqlara başlamaq üçün təzyiq göstərdiyini inkar edir

Vaşinqton/08.11.23/Turan: Çərşənbə günü Dövlət Departamenti Vaşinqtonun Ukraynanı Rusiya ilə danışıqlara vadar etmək üçün ona təzyiq göstərməsi haqqında məlumatları təkzib edib.

"İstənilən danışıqlar Ukraynadan asılıdır. Dəfələrlə dediyimiz kimi, Ukraynasız Ukrayna ilə bağlı heç nə baş verməməlidir", deyə mətbuat katibinin müavini Vedant Patel Turan-ın müxbirinin Moskva ilə sülh danışıqları üçün Kiyevə təzyiq göstərilməsi ilə bağlı sualına cavabda bildirib. 

"Lakin əvvəlki kimi aydındır ki, Kreml danışıqlarda və ya bu müharibəni dayandırmaqda maraqlı deyil və biz ukraynalı tərəfdaşlarımızı dəstəkləmək əzmindəyik", deyə o, sözünə davam edib.

Bir müddət əvvəl Amerika KİV-ləri Vaşinqton və Brüsseldən rəsmi şəxslərin Ukraynanı Rusiya ilə sülh danışıqlarına başlamağa çağırdıqları haqqında məlumat yaymışdı. Bu, son həftələrdə Yaxın Şərqdəki vəziyyət və ABŞ Konqresində Ukraynaya yardım ayrılması ilə bağlı davam edən mübahisələrlə əlaqədar Qərbin Ukraynaya dəstəyinin azalması fonunda baş verir.

Çərşənbə günü Bayden Administrasiyasının dörd yüksək vəzifəli məmuru, o cümlədən dövlət katibi Entoni Blinken Konqresə məktub göndərərək, qanunvericiləri Kiyevə cari hesablarını ödəməyə kömək etmək üçün birbaşa büdcə dəstəyi şəklində 11,8 milyard dollar ayırmaq çağırışı ilə məktub göndərib.

"Rusiya Ukraynada müharibəyə başlayıb və istənilən an onu dayandıra bilər. Bu baş verənə qədər Birləşmiş Ştatların irəliyə doğru aydın yolu var: Ukraynaya özünü müdafiə etməyə kömək etmək. Ukrayna xalqını dəstəkləmək. Rusiyanı məsuliyyətə çağırmaq", deyə dövlət katibi Entoni Blinken bildirib. 0