ABŞ və müttəfiqləri Ukraynaya hərbi yardımı artırırlar

Vaşinqton/08.04.22/Turan: ABŞ və müttəfiqləri Ukraynaya hərbi dəstəyi artırırlar. Pentaqonun məlumatına görə, mart ayında Ağ Evin təsdiqlədiyi tank əleyhinə və hava hücumundan müdafiə sistemləri Ukraynaya çatdırılıb.

Vaşinqton Ukrayna hərbçilərinə kömək məqsədilə əlavə silah sistemləri göndərmək üçün öz müttəfiqləri və tərəfdaşları ilə birlikdə işləməyə davam edir.

Bu həftənin əvvəlində Bayden administrasiyası bildirib ki, Ukraynaya 100 milyon dollar dəyərində “Javelin” tank əleyhinə raketlər göndərəcək. Bu, müharibənin başlamasından bəri dördüncü yardım paketi olacaq.

ABŞ Rusiyanın təcavüzü anından təhlükəsizlik sahəsində 1,7 milyard dollardan çox yardım vəd edib.

Bu günə qədər Ukraynaya göstərilən hərbi yardıma aşağıdakılar daxildir:

* 1400-dən çox “Stinger” zenit sistemi;

* 5000-dən çox “Javelin” tank əleyhinə komplekslər;

* 7000-dən çox digər tank əleyhinə sistemlər;

* Yüzlərlə “Switchblade” taktiki pilotsuz uçuş aparatı;

* 7000-dən çox atıcı silah;

* 50 000 000-dan çox patron;

* 45 000 dəst zirehli jilet və dəbilqə;

* lazerlə idarə olunan raket sistemləri;

* “Puma” pilotsuz uçuş aparatları;

*artilleriya əleyhinə və pilotsuz uçuş komplekslərini izləmək üçün dörd radar;

* dörd minaatan əleyhinə radar sistemi;

* zirehli çoxməqsədli maşınlar;

* gecəgörmə və optik cihazlar;

* taktiki təhlükəsiz rabitə sistemləri;

* peyk çəkilişi;

* sapyorlar üçün avadanlıq;

* tibbi ləvazimatlar -0-