Aclığın beşinci günündə Elman Quliyevin arterial təzyiqi kəskin enib (YENİLƏNİB)

Bakı/02.03.20/Turan: Aclıq aksiyasının beşinci günündə Müsavat Partiyasının fəalı, deputatlığa namizəd Elman Quliyevin vəziyyəti kəskin pisləşib. Bu barədə Turan-a Müsavat Partiyasının mətbuat xidmətinin rəhbəri Mustafa Hacıbəyli məlumat verib. Onun sözlərinə görə, bu gün E.Quliyevin arterial təzyiqi 90-60-a enib.

“Təcili yardım” həkimləri ona dərman qəbul etməyi tövsiyə ediblər, eyni zamanda qlükoza inyeksiyası etməyi təklif ediblər. Ancaq E.Quliyev imtina edib.

Aksiyanın ikinci iştirakçısı, Müsavat Partiyasından deputatlığa namizəd Elşad İsrafil də dördüncü gündür ki, aclıq edir. O da yaxşı görünmür və başgicəllənməsi keçirir.

Aksiya iştirakçıları aclığı ən azı martın 5-nə - Konstitusiya Məhkəməsinin (KM) iclasına qədər davam etdirmək niyyətindədirlər. Martın 5-də KM seçkilərə yekun vuracaq. Əgər nəticələr ləğv edilməsə, onlar aksiyanı dayana bildikləri müddətə qədər davam etdirəcəklər.

Aclıq aksiyası parlament seçkilərinin saxtalaşdırılmış nəticələrinin ləğvi tələbi ilə keçirilir.-06D-

*   *   *

2020 Mart 02 (Bazar ertəsi) 13:15:38

Aclığın üçüncü günündə Elman Quliyevin vəziyyəti pisləşib

Баку/29.02.20/Turan: Müsavat Partiyası Gənclər Təşkilatının rəhbəri Elman Quliyevin təzyiqi kəskin enib və həkimlər üçüncü gün keçirdiyi aclıq aksiyasını dayandırmağı tövsiyə ediblər. Bu barədə Turan-a Müsavat Partiyasının mətbuat xidmətinin rəhbəri Mustafa Hacıbəyli məlumat verib.

M.Hacıbəyli deyib ki, E.Quliyev şikayətinin  aydınlaşdırılması üçün fevralın 29-da səhər Binəqədi Rayon Prokurorluğuna çağırılıb.

“Fevralın 16-da keçirilən etiraz mitinqi zamanı Elman Quliyevi güc tətbiq edərək  saxlayaıblar, mitinqin digər iştirakçıları ilə birlikdə avtobusla Qobustana aparıblar və orada sərbəst buraxıblar. Zorakılıq nəticəsində E.Quliyev belindən xəsarət alıb, indiyədək ağrısı var. Fevralın 18-də polisin hərəkətindən şikayət etməsinə baxmayaraq, yalnız indi, aclıq aksiyasına başladıqdan sonra prokurorluğa çağırılıb”, - M.Hacıbəyli  bildirib.

M.Hacıbəylinin sözlərinə görə, E.Quliyev prokurorluqda ifadə verib, sonra onu tibbi ekspertizaya göndəriblər. “Bütün bunlar, görünür, onun vəziyyətinə pis təsir edib. Aksiyanı davam etdirmək üçün partiyanın qərargahına qayıdanda qəfildən halı pisləşdi, gözləri qaraldı. Biz təcili yardım çağırdıq. Məlum oldu ki, təzyiqi kəskin enib. Həkimlər ona dərman verdilər və aksiyanı dayandırmağı tövsiyə etdilər. Lakin Elman aksiyanı davam etdirməyə qərar verdi”, - M.Hacıbəyli qeyd edib.

Onun sözlərinə görə, ikinci gündür ki, aclıq aksiyası keçirən başqa bir fəal İsrafilin vəziyyəti qənaətbəxşdir.

Aclıq aksiyası parlament seçkilərinin saxtalaşdırılmış nəticələrinin ləğvi tələbi ilə keçirilir.—06D-