ADP ordunun siyasiləşdiyi qənaəti ifadə edir

Demokrat Partiyası (ADP) son zamanlar Azərbaycan ordusunda neqativ hallara qarşı ictimai kampaniya və etirazlara Müdafiə Nazirliyinin mövqeyilə bağlı bəyanat yayıb. 

Bu neqativlərin aşkarlanmasına cavab olaraq 150 zabitin adından Müdafiə Nazirliyinin müdafiəsi ilə bağlı bəyanat yayıldığı qeyd edilir. 

Bəyanatda son vaxtlar orduda müəmmalı əsgər ölümləri, nizam-intizam qaydalarına ciddi riayət edilməməsi, rüşvət, korrupsiya, əsgərlərin məişət problemlərinin vətəndaş cəmiyyətini narahat etdiyi qeyd olunur. Problemlərin aradan qaldırılması üçün ordu üzərində ictimai nəzarətin təmin edilməsinə cəhdlər olması, ordu rəhbərliyinə bu problemləri həll etmək çağırışları olunduğu bildirilir. Nazirliyin bundan nəticə çıxarmaq əvəzinə, vətəndaş cəmiyyətinə qərəzli mövqe nümayiş etdirməsinə, ordunun ayrı-ayrı hərbi hissələrini vətəndaş cəmiyyəti institutlarına qarşı alətə çevrilməsinə təəssüf ifadə olunur.

Sənəddə ayrı-ayrı hərbi hissə zabitləri tərəfindən verilən bəyanatlar ordunun siyasiləşməsi təzahürü sayılır. Ordu ölkənin maraqlarına xidmət edən vətəndaş cəmiyyəti üçün təhlükəyə çevrilən hərbi güc kimi dəyərləndirilir. Müəlliflər ordu rəhbərliyinə dövlətin müdafiə qüdrətinə xələl gəlməməsi və ölkədə ciddi fəsadlar olmaması naminə ictimai-siyasi proseslərdən kənarda durmaq çağırışı edir. Ali Baş Komandana siyasi bəyanatlarla çıxış edən ordu zabitləri barədə ciddi tədbirlər görməsi təklif edilir. -05D-