ADR Hərəkatı prezidentliyə namizədlərin gəlirlərinin və əmlakının açıqlanmasını tələb edir

Bakı/03.04.18/Turan: Azərbaycan Demokratiya və Rifah (ADR) Hərəkatı Mərkəzi Seçki Komissiyasının sədrinə 11 aprel prezident seçkilərində namizədliyi qeydə alınmış şəxslərin Seçki Məcəlləsinin tələbinə uyğun olaraq gəlirləri, torpaq sahəsi, yaşayış sahəsi, mənzilləri, bağları, qaraj və digər bina, tikili, avadanlıqları, eləcə də nəqliyyat vasitələri barədə məlumat verilməsi barədə sorğu ilə müraciət edib. Bu barədə ADR Hərəkatı məlumat yayıb.

ADR Hərəkatı məlumat üçün bildirir ki, Azərbaycan Seçki Məcəlləsininin 58-ci maddəsi ilə müəyyən edilən seçki sənədlərinə prezidentliyə namizədlərin gəlirlərinin miqdarı və mənbələri, eləcə də mülkiyyət hüququ əsasında əmlak barədə məlumat daxildir.

"Seçki Məcəlləsinin 58.3-ci maddəsində göstərilir ki, namizədin gəlirlərinin miqdarı və mənbələri barədə məlumat Mərkəzi Seçki Komissiyasının müəyyənləşdirdiyi bəyannamə formasında, seçkilərin təyin edildiyi gündən əvvəlki bir illik dövr üçün təqdim olunur. Odur ki, seçicilər üçün maraq kəsb etdiyini nəzərə alaraq, Seçki Qanununun şəffaflıq və hesabatlılıqla bağlı tələblərinə əməl edərək Seçki Məcəlləsinin 5 saylı əlavəsində göstərilən torpaq sahəsi, yaşayış sahəsi, mənzillər, bağlar, qaraj və digər bina, tikili, avadanlıqlar, nəqliyyat vasitələri, eləcə də seçkilərin təyin edildiyi gündən əvvəlki bir illik dövr üçün gəlirlər və onların mənbələri haqqında məlumatların mətbuat vasitəsilə açıqlanmasını təmin edin", deyə ADR Hərəkatı MSK sədrinə məktubla müraciət edib.

ADR Hərəkatı sorğusuna cavab verilmədiyi təqdirdə məhkəməyə müraciət edəcəyini bildirir.

MSK-nın saytında prezidentliyə namizədlərin gəlirləri və əmlakı barədə, o cümlədən 8 namizədin hər birinin gəlir və əmlakı barədə axtarışa cavabda saytda belə bir məlumatın olmadığı bildirilir.

MSK-nın mətbuat xidmətindən isə prezidentliyə namizədlərin gəlir və əmlakı ilə bağlı "Amerikanın Səsi"nin sualına cavab almaq mümkün olmayıb.

Prezidentliyə namizəd İlham Əliyevin sədri olduğu Yeni Azərbaycan Partiyasının icra katibinin müavini Suyavuş Novruzov "Amerikanın Səsi"nə müsahibəısində bildirib ki, bu tələbi irəli sürən qurumların "Seçki Məcəlləsi"ni oxumasını təklif edir.

"Seçki Məcəlləsi"ndə göstərilir ki, namizəd seçki vərəqələri ilə birlikdə gəlirləri, mülkiyyəti, vergi ödəmələri haqqında təsdiq olunmuş geniş məlumatı MSK-ya təqdim edirlər. Əgər o səndələr olmasa MSK onları qeydiyyata almalı deyil. Bu sənədlərin siyahısı "Seçki Məcəlləsi"ndə göstərilib. Getsinlər oxusunlar, öyrənsinlər, baxsınlar. Cəmiyyətə yalandan informasiya verirlər", deyə o qeyd edib.

Onun sözlərinə görə, hər bir namizəd seçki gününə 30 gün qalmışadək bu sənədləri təqdim edib.

"Artıq bu sənədlər təqdim olunub və MSK-nın saytında da yerləşdirlib. Eyni zamanda, namizədlərin maliyyə hesabatları da MSK-nın saytında yerləşdirlib".

O, təmsil etdiyi partiyanın namizədi ilə bağlı məlumatlarla bağlı sualın cavabında deyib ki, bu məlumatlar MSK-ya təqdim edilib.

"Kim istəyirsə, MSK-ya müraciət etsin, həmin məlumatları alsın", deyə Novruzov deyib.

Prezidentiyə namizəd Zahid Oruc "Amerikanın Səsi"nə bildirib ki, seçki qanunvericiliyinin tələbinə uyğun olaraq imza vərəqləri ilə bərabər gəlir bəyannaməsi və əmlakımızla bağlı məlumatları təqdim etmişik.

"Doğrudur, bu məlumatların elektron informasiya vasitələrində yayılması MSK-nın səlahiyyətindədir. Lakin öz tərəfimdən deyə bilərəm ki, yaşadığım evin, bağ sahəsinin və başqa bir torpaq yerinin məlumatı, ünvanı, dövlət reyestrindən çıxarış aktı, həmçinin son bir ildə Milli Məclisin deputatı kimi ailə büdcəmizə daxil olan vəsaitin miqdarı orada göstərilib və bu məsələdə hər hansı problem mövcud deyil".

O, bununla bağlı aparılan kampaniyanı əsassız adlandırıb.

"Məndə olan məlumata görə, prezidentliyə namizədlərin hamısı bu məlumatları MSK-ya təqdim edib. Bu ayrı məsələnin mövzusudur ki, bu məlumat nə qədər ictimiyyətə əlçatandır və ya cəmiyyətə təqdim edilib. Bu, qanunvericiliklə müəyyənləşib və namizədlərin səlahiyyətinə aid deyil. Mənə fərdi qaydada müraciət edilsə bu məlumatları ictimailəşdirməyə hazıram", deyə namizəd "Amerikanın Səsi"nə bildirib. -03B-