Məzara görə dövlət rüsumu arasındakı fərq dini diskriminasiya ilə izah edilmir

Dəfn mərasimlərinin baha başa gəlməsi bakılıların narazılığına səbəb olur - bu, təkcə hüzr mərasimlərində verilən yemək bolluğu ilə əlaqədar deyil, həm də "məzar yerlərinin qiyməti" ilə bağlıdır. Bakıda qəbiristanlıqlarda müdiriyyət yerləşdiyi yerdən asılı olaraq hər məzar üçün bir neçə yüz manat tələb edir. KİV-də yayılan məlumata görə, Çəmbərəkənd qəbiristanlığında "elit yerlər" 10 min manatdır. Ancaq məlum olur ki, rüşvət istəyənlərlə bu cür xoşagəlməz söhbətləri aparmamaq da olar, çünki vətəndaşlar onsuz da dövlət rüsumu ödəməlidir.

Turan İnformasiya Agentliyi Bakı Şəhər Əhaliyə Vətəndaşlıq Xidməti Trestinin baş mühəndisi Sabir Həsənovla söhbətində dəfn proseduru ilə maraqlanıb. O bildirib ki, mərhumun qohumları Bakı qəbiristanlığında yerə görə ancaq 63 manat (müsəlman məzarları üçün) və 79 manat (qeyri-müsəlman məzarları) dövlət rüsumu ödəyirlər. S.Həsənov konfessiyalararası fərqin səbəblərini müsəlman və xristian qəbirlərinin həcmi, xristianların mərhumu tabutda dəfn etmək adəti ilə izah edib. "Tabutları mərhumun qohumlarına biz veririk. Tabutlar Trestin müəssisəsində hazırlanır. Xristianlar tabutda dəfn etdikləri üçün məzarı böyük qazmaq lazım gəlir - 1,2-1,5 m. eni, 2,5 m. uzunluğu. Müsəlmanlar üçün məzar 1 -2 metr (en və uzunluq) ölçüsündə qazılır", - S.Həsənov qeyd edib.

Bilmək lazımdır ki, dövlət rüsumu məzarın qazılması üçün alınır, vətəndaşlara torpaq pulsuz verilir. Yəni, qohumlar məzarı özləri qazarsa, dövlət rüsumu ödəməyə bilər.

Məzar və onun ətrafının abadlaşdırılması üçün tikinti materialları vətəndaşların öz vəsaiti və ya Trestdən bazar qiymətinə alınır.

Bakıda 32 qəbiristanlıq Trestə məxsusdur. Qalan məzarlar bələdiyyələrə aiddir. Cəmi 100-ə yaxın qəbiristanlıq var. Təkcə Biləcəri qəsəbəsində üç qəbiristanlıq ərazisi var. Yasamal qəbiristanlığı dəfn üçün bağlıdır. Ancaq qohumlar mərhumun artıq mövcud məzarda kiminsə yanında (boş yer olarsa) və ya nadir hallarda olduğu kimi, mövcud köhnə qəbirdə dəfn olunmasını istəyırsə, müəyyən istisnalar olur. Normativlərə görə, hər məzara onun ətrafında 5 kv. m. torpaq düşür. Əlavə olaraq həyat yoldaşı üçün daha 5 kv.m. götürmək olar.

Hövsan, Buzovna, Zabrat, Biləcəri və Bakıdakı digər qəsəbələrdə qəbiristanlıqlarda boş yerlər çoxdur.

Mərhum üçün yerin ayrılmasına görə müraciət proseduru belədir: vətəndaşlar konkret qəbiristanlığın direktoruna müraciət etməli, vətəndaşın ölümü haqda tibbi arayışı ona təqdim etməlidirlər. Bu sənəd olmadan dəfn mümkün deyil. Vətəndaşlara boş yerlər göstərilir, onlar dövlət rüsumu və əgər istəsələr əlavə xidmətlərə görə haqq ödəyirlər və dəfn həyata keçirilir, baş mühəndis bildirib.

Qəbiristanlıq müdiriyyətinin rüşvət tələb etməsi ilə bağlı sualın cavabında S.Həsənov deyib ki, dövlət rüsumu, xidmətlərə və tikinti materiallarına görə qanuni ödənişlərdən başqa istənilən digər ödəniş qanunvericiliyin pozulmasıdır. O, rüşvət tələb olunduğu halda Trestin 012 510-83-08 saylı "qaynar xətti"nə müraciət etməyi təklif edib.