ADR İbadoğlunun həbs müddətinin uzadılmasını pisləyir və azad olunmasını tələb edir

Bakı/17.11.23/Turan: Azərbaycan Demokratik Rifah Partiyasının (ADR) İdarə Heyəti bəyanatla çıxış edərək, tanınmış ictimai və siyasi xadim, ADR partiyasının sədri, görkəmli iqtisadçı alim və dünyanın bir çox nüfuzlu universitetlərinin professoru,  Qubad İbadoğlunun ilkin həbs müddətinin uzadılmasını qətiyyətlə pisləyir.

18 noyabr 2023-cü ildə yayımlanan bəyanatda Qubad İbadoğlu 23 iyul 2023-cü il tarixdə heç bir hüquqi əsası olmayan qondarma ittihamlarla şərlənərək həbs edilməsi  və 24 iyul 2023-cü il tarixdə onun barəsində 3 ay 26 gün müddətinə həbs qətimkan tədbiri seçilməsi qeyd edilir. «Seçilmiş həbs qətimkan tədbiri müddətinin başa çatmasına baxmayaraq istintaq orqanı ötən müddət ərzində heç bir istintaq araşdırması aparmamış və beləliklə də Q.İbadoğlunun mənəvi, psixoloji və sağlamlıq durumunun təhlükəli həddə olması ilə bağlı cismani işgəncələrə məruz qalmasına məqsədli olaraq şərait yaratmışdır», - daha sonra bəyanatda deyilir.

Qubad İbadoğlunun səhətində yaranmış həyatı təhlükə ilə bağlı mütərəqqi dünya ictimaiyyətinin, o cümlədən, beynəlxalq birliklərin, aparıcı dövlətlərin, nüfuzlu akademik dairələrin, AİHM-nin və s. çağırışlarına baxmayaraq hakimiyyət onu nəinki azad etməmiş, hətta ötən həbs qətimkan tədbiri müddətində keçirilmiş 25 məhkəmə prosesində pozulmuş hüquqlarının bərpasına dair verilmiş vəsatətlər və şikayətlər heç bir hüquqi əsas göstərilmədən təmin edilməmişdir.

ADR əmindir ki,  professor Qubad İbadoğlunun «həbsi dövlət başçısı İlham Əliyevin siyasi iradəsi əsasında baş tutmuşdur və siyasi xarakterlidir», hakim elitanın  korrupsiya cinayətlərinin ifşası, və dövlət başçısın perspektivdə görünən rəqiblərini dövlət resurslarından istifadə edərək sıradançıxarma tədbiri ilə bağlıdır.

ADR hesab edir ki, «Qubad İbadoğlunun heç bir hüquqi əsas olmadan həbs edilməsi ona və Azərbaycanın fəal ictimai siyasi kəsiminə qarşı kütləvi qorxu yaratma məqsədi daşıyır».

«Həbs qətimkan tədbiri müddətinin daha 3 ay artırılması Qubad İbadoğlunun səhhətinin kritik durumda olmasından sui-istifadə edərək onu qeyri-qanuni tələblərə tabe etdirmək məqsədi daşıyır», - daha sonra bəyanatda vurğulanır.

ADR hesab edir ki, «Q.İbadoğluya qarşı törədilən bütün qeyri-qanuni və antiinsani əməllərə son verilməli və o, dərhal azad edilməlidir».

«Azərbaycan hakimiyyətini, xüsusilə ölkə başçısını antikonstitusion xarakterli əməllərdən çəkinməyə dəvət edir, üzərlərinə düşən hüquqi vəzifələri ləyaqətlə yerinə yetirmələrini, siyasi rəqibləri sıradançıxarma tendensiyalarına son qoymalarını və bütün siyasi məhbusları dərhal azad etmələrini tələb edirik», - sonda bəyanatda deyilir.—06D-