Ağ Ev milli təhlükəsizlik strategiyasını açıqlayıb

Vaşinqton/13.10.22/Turan: Soyuq müharibədən sonrakı dövr "birdəfəlik başa çatıb", - çərşənbə günü Bayden administrasiyası Ukraynada baş vermiş müharibə səbəbindən təxirə salınmış yeni milli təhlükəsizlik strategiyasını açıqlayarkən bildirib,  Turan-ın Vaşinqtondakı müxbiri məlumat verib.

"Dünya dönüş nöqtəsindədir və bu gün etdiyimiz seçim gələcək illərdə ortaya çıxacaq problemlərin öhdəsindən necə gələcəyimizi müəyyənləşdirəcək", - milli təhlükəsizlik üzrə müşavir Ceyk Sallivan jurnalistlərə bildirib.

Yeni sənəddə Vaşinqtonun əleyhdarları ilə rəqabət aparmaq, eləcə də iqlim dəyişikliyi kimi qlobal təhlükələrə qarşı mübarizədə əməkdaşlıq etmək niyyətindən bəhs edilir.

Strategiyaya görə, ən çətin problem "avtoritar idarəetməni xarici siyasətə tabe edən fövqəldövlətlərdir", yəni, Çin və Rusiyadır.

Çin “beynəlxalq düzəni dəyişmək niyyətində olan, eyni zamanda, bundan ötrü böyük iqtisadi, diplomatik, hərbi və texnoloji gücü olan yeganə rəqibdir",- strategiyada deyilir.

Administrasiya məmurları bildirirlər ki, Vaşinqton bu yarışda qalib gəlmək üçün ölkələrə Çinlə Tayvan arasında sülhün dəstəklənməsi üzərində işləməyə, Çinə diplomatik yanaşmanın razılaşdırılmasına, ABŞ və Çinin maraqlarının üst-üstə düşdüyü sahələrdə Pekinlə işləməyə kömək edəcək.

Beynəlxalq düzənin əsas elementlərini sındırmaq məqsədilə "imperialist xarici siyasət"i seçən Rusiyaya gəlincə, Vaşinqton bu ölkəni Ukraynaya hücum etdiyinə görə cəzalandırıb.

Dövlət katibi Entoni Blinken bildirib ki, "Amerika diplomatiyası maksimum güclü və geniş koalisiya yaratmaq üçün müttəfiq və tərəfdaşlardan istifadəni davam etdirəcək".

"Beynəlxalq sülhü və sabitliyi sarsıdan avtoritar qüvvələrdən birlikdə qorunacağıq".

Çin ilə olduğu kimi, Bayden administrasiyası Rusiya ilə də tərəfdaşlığın "qarşılıqlı faydalı" ola biləcəyi sahələrdə əməkdaşlıq üçün açıqdır.

Turan-ın müxbirinin “ABŞ Rusiyanı milli təhlükəsizliyə əsas təhlükə sayırmı?” sualının cavabında  Dövlət Departamentinin nümayəndəsi Ned Prays deyib ki, şübhə yoxdur ki, Rusiya beynəlxalq düzənə təhlükə yaradır". 25B