AİHM İlqar Məmmədovun Azərbaycana qarşı ikinci şikayətini təmin edib

Bakı/16.11.17/Turan: Avropa İnsan Hüquqları Məhkəməsi (AİHM) bu gün həbsdə olan Azərbaycanlı müxalifətçi, ReAl Hərəkatının lideri İlqar Məmmədovun işi üzrə ikinci qərarını elan edib.

Belə ki, Strasburq Məhkəməsi onun Avropa İnsan Hüquqları Konvensiyasının 6-cı (ədalətli məhkəmə təhqiqatı) maddəsi üzrə hüquqlarının pozulduğunu təsdiq edərək, hökmdən verdiyi şikayəti təmin edib və ona 10 min avro ölçüsündə pul kompensasiyası ödənilməsi barədə qərar verib.

Bu barədə Turan-a onun vəkili Fuad Ağayev bildirib. Bu, AİHM-nin Məmmədovun işi üzrə ikinci qərarıdır.

ReAl Hərəkatının lideri İlqar Məmmədov 2013-cü ilin yanvarında İsmayıllı rayonunda iğtişaşların təşkili ittihamı ilə həbs edilib və 7 il müddətinə azadlıqdan məhrum edilib.

Amma Avropa İnsan Hüquqları Məhkəməsi onun həbsini qanunsuz və siyasi motivli hesab edib və dərhal azad edilməsi barədə qərar çıxarıb. 2014-cü ilin mayında qəbul edilmiş bu qərar indiyədək icra edilməyib.

2017-ci il oktyabrın 25-də Avropa Şurası Nazirlər Komitəsi Azərbaycana AİHM-nin İlqar Məmmədovun işi üzrə qərarının icrasını təmin etmək zərurəti ilə bağlı hüquqi tədbirlər həyata keçirməyə başladığı barədə rəsmi xəbərdarlıq edib. Məmmədov azad edilməsə, bu prosedurların sonu Azərbaycana qarşı sanksiyalar tətbiq edilməsi ola bilər. -06B-