Akif Qurbanov Avropa Şurası Parlament Assambleyasını Azərbaycanda hüquq pozuntularına biganə qalmamağa çağırıb

Bazar ertəsi Avropa Şurası Parlament Assambleyasının sessiyasında Vatslav Havel adına mükafatın təqdimetmə mərasimi keçirilib. Mükafat Avropada və onun hüdudlarından kənarda insan hüquqlarının müdafiəsində vətəndaş cəmiyyətinin nailiyyətinə görə verilir.

Bu il mükafata venesuelalı hüquq müdafiəçisi Mariya Korina Maçado layiq görülüb. O, mülki və siyasi azadlıq, hüquqlar və vətəndaş iştirakı naminə "Sumate" könüllü mülki təşkilatın həmtəsisçisidir.

Namizədlərin siyahısında azərbaycanlı hüquq müdafiəçisi, siyasətçi və vətəndaş cəmiyyətinin fəal üzvü, hazırda həbsdə olan Akif Qurbanov da olub.

Turan-ın Strasburqdakı xüsusi müxbiri bildirib ki, Qurbanovun vəkili Şəhla Hümbətova onun Bakı İstintaq Təcridxanasından Avropa Şurası Parlament Assambleyasının deputatlarına müraciətini oxuyub.

O, öz  müraciətində Azərbaycanda insan hüquqlarının pisləşməsinə,  tənqidi səslərin susdurulmasına, vətəndaşların elementar hüquqlarının pozulmasına diqqəti çəkib.

Qurbanov həmçinin “Abzas Media” və “Toplum” TV-yə qarşı cinayət işləri barədə məlumat verib. Bu işıər çərçivəsində ondan jurnalistin və fəalın həbs olunduğunu, onlarla adamın dindirilməyə çağırıldığını, hərəkət azadlığının məhdudlaşdırıldığını bildirib.

Qurbanov Avropa Şurası Parlament Assambleyasının deputatlarını və Avropa birliyini Azərbaycanda əsassız təqib olunanların taleyinə biganə qalmamağa, öz təhlükəsizliyini böyük riskə ataraq işini davam etdirənlərlə həmrəylik nümayiş etdirməyə çağırıb.

Havel mükafatına başqa bir namizəd Gürcüstanın aparıcı feminist fəalı və insan hüquqları üzrə vəkili Babutsa Pataraya idi.

Demokratik Təşəbbüslər İnstitutunun direktoru və III Respublika Platformasının rəhbəri Akif Qurbanov 6 mart 2024-cü il tarixində “Toplum” TV-nin işi çərçivəsində saxlanılıb. Martın 8-də Xətai Rayon Məhkəməsi onu 4 ay müddətinə həbs edib, sonradan həbs müddəti uzadılıb.

Həbs olunanların hamısı valyuta qaçaqmalçılığında ittiham olunur, hakimiyyətyönlü KİV isə həmin şəxslərin guya xaricdən  "qanunsuz" qrant aldığını bildirir.

Vatslav Havel mükafatı 2013-cü  ildən təqdim olunur. 2014-cü ildə mükafat  o zaman həbsdə olan hüquq müdafiəçisi Anar Məmmədliyə verilmişdi. Anar Məmmədli yenə də həbsdədir.