Amerika -Azərbaycan Yaşıl Enerji Forumu

Bakı/03.04.23/Turan: Aprelin 2-4-də Bakıda səfərdə olan ABŞ ticarət katibinin qlobal bazarlar üzrə köməkçisi və ABŞ xarici ticarət xidmətlərinin baş direktoru Arun Venkataraman Azərbaycanın energetika sektorunun nümayəndələrilə birlikdə ABŞ-Azərbaycan Yaşıl Enerji Forumunda iştirak edib. Bu barədə ABŞ-ın Azərbaycandakı səfirliyinin məlumatında deyilir.

Forum bölgədə yaşıl enerjiyə dair həll yollarının, strategiyaların və imkanların inkişafına həsr olunub. Tədbirdə Azərbaycanın yaşıl enerji ekosisteminin inkişafında maraqlı olan doqquz Amerika şirkəti iştirak edir.

Texniki və maliyyə təcrübəyə malik bu şirkətlər Azərbaycana neft və qazdan iqtisadi asılığının azaldılması habelə günəş və külək enerjisi daxil olmaqla, ölkənin güclü bərpa olunan enerji potensialından yararlanmağa dəstək verməyə hazırdır. Bu, karbon qazı tullantılarının azaldılmasına imkan verəcək, - səfirliyin məlumatında deyilir. 

Energetika nazirinin müavini Elnur Soltanov bildirib ki, 2040-cı ilə qədər mərhələli şəkildə işə salınması planlaşdırılan istehsal gücləri ölkənin tələbatından dəfələrlə çoxdur. Bu layihələr Azərbaycanın tərəfdaşlarının enerji təhlükəsizliyinə töhfə olacaq və "yaşıl enerji"yə problemsiz keçidi təmin edəcək.

"ABŞ Ticarət Nazirliyi, eləcə də ABŞ-ın özəl sektoru yaşıl enerji sahəsində məqsədlərinə çatmaqda Azərbaycanı dəstəkləməyə hazırdır", -  ticarət nazirinin köməkçisi Venkataraman deyib.

ABŞ 2050-ci ilədək ətraf mühitə tullantıların səviyyəsini sıfıra çatdırmaq öhdəliyi götürüb, Venkataraman qeyd edib.

ABŞ səfirliyinin müvəqqəti işlər vəkili Hüqo Qevara qeyd edib ki, bu forum bizim  ABŞ və Azərbaycan arasında iqtisadi əlaqələrin genişləndirilməsinə imkan yaradır. O, Avropanın enerji təhlükəsizliyində Azərbaycanın mühüm rolunu vurğulayıb.

“Energetika sahəsi həmişə bizim iqtisadi əməkdaşlığımızın vacib hissəsi olub və ABŞ Azərbaycanın enerji sahəsində etibarlı təchizatçı rolunu dəstəkləyir. Bu forum Azərbaycanın yaşıl enerji potensialının tam mənimsənilməsi üçün texniki və tənzimləyici innovasiyaların həyata keçirilməsinə yardım edəcək”,- diplomat deyib.

Ticarət Departamentinin Avrasiya məsələri üzrə baş müşaviri Hizer Berns qeyd edib ki, bütün dünyada neft və qaz hasil edən ölkələr karbon qazı tullantılarının azaldılması üçün yaşıl enerji layihələrini həyata keçirirlər.

Səfər çərçivəsində ticarət katibinin köməkçisi Venkataraman Azərbaycanın energetika, nəqliyyat və iqtisadiyyat sektorlarında çalışan yüksən vəzifəli şəxslərlə görüşlər keçirəcək,  ABŞ və Azərbaycan arasında ticarət və investisiya imkanlarını müzakirə edəcək.16D06