Amerika səfirliyi Gənc Liderlər Proqramını elan edib

Amerikanın Azərbaycandakı səfirliyi Gənc Liderlər Proqramını (GLP) elan edib.     

    Səfirliyin məlumatında deyilir ki, bu il GLP 16 amerikalı məktəbli və 3 amerikalı məktəb müəllimini Azərbaycana gətirir. Sentyabrda isə 34 azərbaycanlı məktəbli və 6 azərbaycanlı məktəb müəllimi ABŞ-a səfər edəcək. 

    Belə ki, iyulun 9-dan etibarən amerikalı məktəblilər Azərbaycan ərazisində səyahət edərək üç həftə keçirəcək, əsasən Bakı və Gəncədə ev sahibliyi etməyə könüllü olan ailələrdə yaşayacaq. Onlar ölkə ərazisində icmanın inkişaf etdirilməsi və qeyri-hökumət təşkilatları sahələrində işləyəcək.    

    Sentyabrın sonunda isə azərbaycanlı məktəbli və müəllimlər Arizona və Vaşinqton ştatlarına yollanacaq. Orada onlar eyni vərdişlərin inkişaf etdirilməsi, problemlərin həlli, Foniks və Seatlda təhsil kursları, amerikalı əməkdaşlar ilə görüşlərdə iştirak edəcək.

    GLP Amerika Şurası tərəfindən idarə olunur. 1974-cü ildə ərazi və dil mütəxəssisləri üçün assosiasiya kimi əsası qoyulan Amerika Şurası öz təcrübəsini akademik mübadilə, dil təlimləri, məsafəli təlim, kurrikulum, testlərin inkişaf etdirilməsi və qurum yaratmaq sahələrində mərkəzləşdirib. Təşkilat ABŞ, Avrasiya, Şərqi Avropa ölkələrində fərdlər və qurumlar arasında əməkdaşlıq proqramlarını inkişaf etdirir, layihə dizaynı, təhsildə yenilikçi proqramlar ilə bağlı məsləhətləşmələr aparır, ABŞ-da Avrasiya dillərinin və ərazilərinin tədqiqatlarının inkişaf etdirilməsinə fəal şəkildə töhfələr verir. Maliyyə dəstəyi ABŞ-ın İnkişaf Agentliyi, ABŞ Dövlət Departamenti, ABŞ Təhsil Departamenti, Konqres Kitabxanası, Rusiya Federasiyası və Qazaxıstan hökumətləri, Dünya Bankı, Karnegi Korporasiyası, Açıq Cəmiyyət İnstitutu/Soros Fondu və digərləri də daxil olmaqla, ictimai və özəl mənbələrdən gəlir. -03D-