Amnesty International Meydan TV jurnalistlərinin həbsini pisləyib

Amnesty International beynəlxalq hüquq müdafiə təşkilatı Azərbaycanda Meydan TV jurnalistlərinin həbsini pisləyib. 

"COP29-un keçirilməsindən iki həftə sonra Azərbaycanda yeni həbs dalğası çərçivəsində ən az altı jurnalist saxlanılıb. Biz sonuncu həbsləri pisləyirik və Azərbaycan hakimiyyətini jurnalistləri və KİV əməkdaşlarını dərhal azad etməyə çağırırıq. 

Biz COP29-dan sonra repressiyalardan ehtiyatlanırdıq və indi BMT konfransının iştirakçısı olan dövlətləri Azərbaycanda - hələ də COP29 sədri vəzifəsini tutan ölkədə davam edən təqiblərə reaksiya verməyə çağırırıq", deyə təşkilatın bəyanatında bildirilir.

Müstəqil jurnalistlərin, o cümlədən Meydan TV əməkdaşlarının sonuncu həbsləri bir il əvvəl başlamış və müstəqil tənqidi səslərin boğulmasına yönəlmiş repressiyaların tərkib hissəsidir, deyə Amnesty International qeyd edir.

Bu, Abzas Media, Toplum TV, Kanal 13 və digər nəşrlərin, indi isə həm də Meydan TV əməkdaşlarının, həmçinin alim və fəalların həbslərinə gətirib çıxarıb, deyə hüquq müdafiəçiləri vurğulayır.

Article19 beynəlxalq jurnalist təşkilatı da Azərbaycanda jurnalistlərin yeni həbslərini pisləyib.

"Bakıda iqlim sammitindən bir neçə həftə sonra ən az 7 jurnalist saxlanılıb - onların əksəriyyəti Meydan TV-nin əməkdaşıdır. Repressiyalar Azərbaycanın tənqid və fərqli düşüncəyə dözümünün olmaması haqqında yeni bir xatırlatmadır. Biz mətbuat azadlığına qarşı təzyiqlə mübarizəni davam etdirməliyik", deyə təşkilat X sosial şəbəkəsindəki hesabında yazıb.

* Meydan TV-nin 5 əməkdaşı və iki digər media nümayəndəsi dekabrın 6-da "qabaqcadan əlbir olan bir qrup şəxs tərəfindən xarici valyuta qaçaqmalçılığı" ittihamı ilə saxlanılıb. 

Dekabrın 8-də məhkəmə bütün saxlanılan şəxsləri 4 ay müddətinə həbs edib. Hüquq müdafiəçiləri onları siyasi məhbus kimi tanıyıblar.