Anar Məmmədlinin işi üzrə hazırlıq iclası keçirilib

Aprelin 21-də Bakı Ağır Cinayətlər Məhkəməsində hakim Rauf Əliyevin sədrliyi ilə Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli, bu QHT-nin icraçı direktoru Bəşir Süleymanlının və Könüllülərin Beynəlxalq Əməkdaşlığı İctimai Birliyinin rəhbəri Elnur Məmmədovun işi üzrə hazırlıq iclası keçirilib.

Onlar CM-in 5 maddəsi ilə – vergidən yayınma, qanunsuz sahibkarlıq, vəzifə səlahiyyətindən sui-istifadə, iri məbləğdə əmlakın mənimsənilməsi və vəzifə saxtakarlığı- ittiham olunurlar. Onların üçü bu itthamları rədd edir.

Bu cinayət işi 2013-cü ilin sonlarında açılıb. Dekabrın 17-də A.Məmmədli həbs edilib, digər iki nəfərsə ölkədən çıxmamaq haqda iltizam verib.

Hazırlıq iclası zamanı A.Məmmədli dəmir barmaqlıq arxasında əyləşdirilib.

Məhkəmə iclası ictimaiyyətin, həmçinin xarici diplomatik korpusun bu işə diqqətinin artmasına səbəb olub.

İclasda vətəndaş cəmiyyəti fəalları, ABŞ, Almaniya, Böyük Britaniya, Niderland səfirliklərinin nümayəndələri və Aİ təmsilçiləri iştirak ediblər.

İclasın əvvəlində vəkil Elçin Sadıqov A.Məmmədlinin müdafiə hüququnun təmin olunması məqsədilə onun dəmir barmaqlıq arxasından çıxarılaraq vəkilləri ilə yanaşı oturması barədə vəsatət qaldırıb.

Bundan əlavə, E.Sadıqov geniş ictimai marağı nəzərə alaraq prosesin KİV-də geniş işıqlandırılması üçün videoçəkilişin aparılması barədə vəsatət qaldırıb.

Sonra E.Sadıqov cinayət işinin dayandırılması barədə vəsatət qaldırıb.

Belə ki, vəkil müttəhimlərə qarşı maliyyə sanksiyasının irəli sürülməsini

qanunsuz sayır, çünki Vergilər Nazirliyi nə kameral, nə də səyyar vergi yoxlaması aparmayıb.

Digər tərəfdən Amerika-Azərbaycan hökumətlərarası sazişinə görə, ABŞ-ın maliyyə yardımı ƏDV-dən azaddır.

Pul vəsaitinin mənimsənilməsi ittihamı da absurddur, çünki ittihamın bu hissəsi üzrə zərərçəkən yoxdur.

Vəzifə səlahiyyətindən sui-istifadəyə gəlincə, istintaqın məlumatına görə, bu, özünü seçkilərin nəticələrinə təsirdə göstərib ki, bu da cəfəngdir. Çünki SMDTM-nin seçkiləri saxtalaşdırmaq imkanları olmayıb.

Digər müttəhimlər B.Süleymanlı və E.Məmmədovun vəkilləri Əlibaba Rzayev və Cavad Cavadlı da vəsatətləri dəstəkləyiblər.

Digər vəkil Fariz Namazlı A.Məmmədlinin barəsində həbs qətimkan tədbirinin ev həbsi və ya pul girovu ilə əvəzlənməsi barədə vəsatət qaldırıb. O deyib ki, istintaq başa çatıb və A.Məmmədli şahidlərə təsir göstərmək, sübutları saxtalaşdırmaq imkanlarına malik deyil, odur ki, onu həbsdə saxlamağın mənası yoxdur.

F.Namazlı da “vəzifə səlahiyyətindən sui-istifadə” ittihamının əsassız olduğunu deyib.

Zərərçəkmiş qismində cəlb edilən Sahib Rüstəmli, Elşən Süleymanov və Kamil Əliyev də vəsatətləri dəstəkləyiblər.

Həmin şəxslər SMDTM-nin layihələrində iştirak ediblər, lakin onların özlərinin heç bir iradı olmadığı halda istintaq onları zərərçəkmiş kimi işə

cəlb edib.

Vəkil F.Namazlı bildirib ki, iş üzrə yalnız qrantverənlər zərərçəkmiş kimi çıxış edə bilər, çünki istintaq onların vəsaitinin mənimsənildiyini bildirir.

Vəkil Ə.Rzayev Maliyyə və Vergilər nazirliklərinin ekspertlərinin şahid qismində məhkəməyə çağırılması barədə vəsatət qaldırıb.

Hakim bütün vəsatətləri rədd edib. Yalnız A.Məmmədlinin proses zamanı vəkillərlə yanaşı əyləşməsinə və əlavə şahidlərin çağırılmasına icazə verib.

İşə mahiyyəti üzrə baxılması aprelin 28-nə təyin edilib.16D06--