Apellyasiya Məhkəməsi fəalı həbsdə saxlayıb

Oktyabrın 21-də Bakı Apellyasiya Məhkəməsi ictimai fəal Nicad İbrahimin ev dustaqlığına buraxılmasından imtina barədə şikayəti təmin etməyib.

Vəkil Zibeyd Sadıqova Turan-a bildirib ki, proses zamanı müdafiə tərəfi İbrahimin zərərçəkən kimi tanınan şəxsə bədən xəsarəti yetirməsinə dair sübutların təqdim edilməsi barədə vəsatət qaldırıb.

İstintaqın məlumatına görə, İbrahim başqa şəxsə bıçaq xəsarəti yetirib. Belə olduğu halda, insident guya hadisənin baş verdiyi yanacaqdoldurma məntəqəsinin videokameralarına düşməliydi.

Müdafiə tərəfinin vəsatətinə cavab olaraq müstəntiq deyib ki, yanacaqdoldurma məntəqəsindən videoyazıların tələb olunması barədə tapşırıq verilib.

«Videolar artıq işdə olmalıydı, çünki 16 gün keçib",- vəkil deyib. O hesab edir ki, istintaq videosübutları yubadır ki, sonradan qeydlərin saxlanılmadığını bildirsin.

Müdafiə tərəfinin məlumatına görə, nəzərdə tutulan video İbrahimə qarşı yeganə sübutdur və hələlik o yoxdur, fəalı isə əsassız olaraq həbsdə saxlayırlar. Lakin məhkəmə bu dəlilləri qəbul etməyib və şikayəti təmin etməyib.

Vəkilin sözlərinə görə, İbrahim prosesdə bildirib ki, ona qarşı qanunsuz cinayət təqibinə etiraz olaraq oktyabrın 5-dən başladığı aclığı davam etdirəcək.

* Nicat İbrahim sentyabrın 9-da qəsdən sağlamlığa ciddi ziyan vurmaqda ittiham olunaraq polis tərəfindən saxlanılıb (Cinayət Məcəlləsinin 126.1-ci maddəsi).

İbrahim hesab edir ki, Daxili İşlər Nazirliyinin onun  ölkədən çıxışına qadağa qoymasına  etiraz etdiyinə görə cəzalandırılır və buna görə də oktyabrın 5-dən istintaq təcridxanasında aclıq edir.

Sentyabrın 6-da sərhədçilər bu qadağanı əsas gətirərək onu Bakı-Kişinyov reysinə buraxmayıblar. Eyni zamanda, onun xanımını və 2 azyaşlı uşağını təyyarəyə buraxıblar.

Bundan sonra o, Daxili İşlər Nazirliyinə zəng edərək qadağanın ləğvini tələb edib və özünü nazirliyin binası qarşısında yandırmaqla hədələyib.

Sentyabrın 9-da onu saxlayıblar və ittiham ediblər.

** Nicat İbrahim 2021-ci ildə  bir dəfə cinayət məsuliyyətinə cəlb edilib və karantin rejimini pozmaqda ittiham olunaraq 15 ay müddətinə azadlıqdan məhrum edilib. Həbsin səbəbi Prezident Administrasiyası qarşısında təkbaşına piket keçirməsi olub.