Aprel döyüşləri şanlı qələbəmizdir – İlham Əliyev

İlham Əliyev ötən ilin aprelində Qarabağ cəbhəsində həyata keçirilmiş döyüş əməliyyatlarının nəticələrini Azərbaycan ordusunun “şanlı qələbəsi” hesab edir.

“Aprel döyüşləri bizim şanlı hərbi qələbəmizdir, dövlətimizin, xalqımızın, ordumuzun gücünü göstərən qələbədir. Aprel döyüşləri nəticəsində işğaldan azad edilmiş Füzuli, Cəbrayıl və Ağdərə rayonlarında bu gün Azərbaycan bayrağı dalğalanır”, deyə o, bir qrup hərbiçi ilə görüşündə bildirib.

“Azərbaycan xalqı və dövləti heç vaxt işğalla barışmayacaq, öz ərazi bütövlüyünü nəyin bahasına olursa-olsun bərpa edəcək”, deyə Əliyev qeyd edib.

Onun sözlərinə görə, aprel döyüşləri Azərbaycan ordusunun yüksək peşəkarlığını göstərib. “Ordumuz əlverişsiz mövqelərdən əks-hücum əməliyyatı apararaq strateji mövqelərə sahib oldu. Bu gün bu strateji yüksəkliklər, mövqelər, işğaldan azad edilmiş ərazilər bizə imkan verir ki, təmas xəttində mövcud olan vəziyyətə tam nəzarət edək və istədiyimiz tədbiri görə bilək”, deyə Əliyev bildirib. -05В06-