A.Quliyev: Bakı şəhər icra hakimiyyəti mitinq hazırlığına mane olmaq istədi

Demokratik Qüvvələrin Milli Şurasının (DQMŞ) 28 sentyabr aksiyasına hazırlıq davam edir. Bu haqda Turan-a Mitinq Komitəsinin üzvü Asəf Quliyev bildirib.

O, prezident seçkilərinin təbliğat kampaniyası mərhələsində bütün istiqamətlər üzrə fəaliyyət göstərdiklərini bildirib. Texniki baxımdan mitinqə hazırlığın başa çatdığı vurğulanıb. Aksiyaya dəvətlə bağlı qurumun prezidentliyə namizədi Cəmil Həsənlinin tele-debatda seçicilərə çağırış edəcəyi, şəhərdə vərəqlərə paylanacağı bildirilib. Bununla yanaşı, sosial şəbəkələr vasitəsilə mitinqə çağırış edilməsi də nəzərdə tutulur. 

Bakı şəhər icra hakimiyyətinin aksiyanın keçirilməsini bir gün irəli çəkərək, sentyabrın 28-nə icazə verməsinə narazılıq ifadə edib. O qeyd edib ki, Şura “Məhsul” idman-kompleksinin stadionunda aksiya keçirmək üçün prezidentliyə namizəd Hafiz Hacıyevdən əvvəl müraciət etsə də, Bakı şəhər icra hakimiyyəti H.Hacıyevə icazə verib. A.Quliyev Bakı şəhər icra hakimiyyətinin mitinqin keçirilməsini bir gün irəli çəkməklə verdiyi icazəni mitinq hazırlığına mənfi təsir etmək cəhdi adlandırıb. “Amma buna baxmayaraq, biz aksiyanı uğurla keçirməyə tam hazırıq”, - deyə A.Quliyev qeyd edib.

C.Həsənlinin Seçki Qərargahının həmsədri Gözəl Bayramova prezidentliyə namizədin sentyabrın 27-də Cəlilabadda keçirməsini nəzərdə tutduğu mitinqlə bağlı açıqlama verərək, aksiyanın təxirə salındığını deyib. Onun sözlərinə görə, sentyabrın 28-də Bakıda aksiya keçirildiyi üçün həmin mitinqin keçirilməsi başqa vaxta nəzərdə tutulur. -05B-