Arif Yunus KİV-ə müsahibə verməsinə və İnternet yazışmalarına görə 3 ay müddətinə həbs olunub (YENİLƏNİB)

Avqustun 5-də Nəsimi Rayon Məhkəməsi konfliktoloq Arif Yunusun 3 ay müddətinə həbs olunması barədə qərar çıxarıb.

İyulun 30-da o, polis nəzarətinə götürülüb, həyat yoldaşı, SDİ-nin direktoru Leyla Yunus isə həbs olunub. Onlar dövlətə xəyanətdə və digər cinayətləri törətməkdə ittiham olunurlar.

Baş Prokurorluğun mətbuat xidmətinin məlumatında deyilir ki, A.Yunusun həbsi cinayət-prosessual qanunvericiliyin tələblərini pozması ilə əlaqədardır. Belə ki, A.Yunus polisin icazəsi olmadan dəfələrlə yaşadığı rayonun ərazisini tərk edib, cinayət təqiblərinə məruz qalan şəxslərlə görüşüb, İnternet yazışması  ilə məşğul olub, KİV-ə müsahibə verib və bu müsahibədə birtərəfli,  həqiqətəuyğun olmayan məlumatlar verib”, - prokurorluğun məlumatında deyilir.—1606D--

2014 Avqust 05 (Çərşənbə axşamı) 12:46:46

Tanınmış konfliktoloq, Sülh və Demokratiya İnstitutunun əməkdaşı Arif Yunus bu gün Bakı İstintaq Təcridxanasında saxlanılan həyat yoldaşı Leyla Yunusun yanına gedərkən saxlanılıb.

Vəkil Xalid Bağırov Turan-a bildirib ki, öncə A.Yunusu Yasamal Rayon Polis İdarəsinin 27-ci bölməsinə aparıblar. Sonra vəkilə bildirilib ki, A.Yunus Baş Prokurorluğun Ağır Cinayətlər üzrə İstintaq İdarəsinin müstəntiqi İbrahim Ləmbəranskinin yanına aparılıb.

Vəkil A.Yunusun da həbs olunacağından ehtiyat etdiyini bildirib.  –06D-