AŞPA həmməruzəçiləri siyasi məhbusların azad edilməsində maraqlıdır

Azərbaycanda səfərdə olan AŞPA həmməruzəçiləri Stefan Şennak (Avstriya) və Sesar Florin Preda (Rumıniya)  yanvarın 13-də Müsavat Partiyasının  rəhbəri Arif Hacılı, Azərbaycan Xalq Cəbhəsi Partiyasının (AXCP) sədri Əli Kərimli və REAL Hərəkatının icraçı katibi Natiq Cəfərli ilə görüşüblər.

A.Hacılı Turan-a bildirib ki, görüşdə demokratiya və insan haqları ilə bağlı vəziyyət, siyasi məhbuslar problemi, Konstitusiyaya düzəlişlərlə bağlı referendum, Qarabağ nizamlanması, seçki qanunvericiliyinin vəziyyəti müzakirə olunub.

“İnsan hüquqlarının vəziyyəti mənfi istiqamətdə inkişaf edir, vətəndaş cəmiyyəti, media və siyasi partiyaların fəaliyyətini tənzimləyən qanunvericilik pisləşir. Hər yeni seçki əvvəlkindən daha pis keçirilir, siyasi məhbusların sayı artır”, - A.Hacılı bildirib.

Onun sözlərinə görə, həmməruzəçilər bildiriblər kİ, müxalifətçilərin qaldırdığı məsələlər diqqət mərkəzində saxlanılacaq və problemin həlli üçün bütün tərəflərlə dialoq daha fəal dəstəklənəcək.

A.Hacılı qeyd edib ki, Avropa Şurasında avtoritar rejimli müxtəlif dövlətlər təmsil olunur.

Son illər Azərbaycan da daxil olmaqla, belə ölkələr lobbi qruplarından istifadə edərək onlara qarşı tənqidi qərarların qəbulunun əleyhinə çıxıblar.

O, buna misal olaraq Kristof Ştrasserin Azərbaycanda siyasi məhbuslar haqda hesabatının uğursuz  olduğunu göstərib.

İndi isə İtaliyanın keçmiş millət vəkili  Luka Volonteyə qarşı  istintaqdan sonra  Ştrasserin hesabatına qarşı çıxmaq üçün bəzi deputatların ələ alınması faktları ortaya çıxıb.

A.Hacılı hesab edir ki, Avropa Şurası və onun bütün strukturları öz prinsip və dəyərlərinin müdafiəsində  daha ardıcıl olmalıdırlar.

REAL Hərəkatının icraçı katibi Natiq Cəfərlinin sözlərinə görə, məruzəçilər  "Azərbaycandakı problemlər haqda məlumatlı olduqlarını” nümayiş etdiriblər.

Onlar hətta bloger Mehman Hüseynovun qaçırılması və işgəncə verilməsi ilə bağlı son olaydan da xəbərdar olublar.

Yeri gəlmişkən, AŞPA nümayəndələrinin səfəri ərəfəsində blogerə qarşı görünməmiş qanunsuzluq göstərir ki, hakimiyyətin ali eşelonlarında Qərblə Azərbaycanın münasibətlərini mümkün qədər daha çox korlamağa cəhd edən Rusiyameylli  qüvvələr var.

N.Cəfərlidə belə təəssürat yaranıb ki, həmməruzəçilərin konkret nəticələrə nail olmaq istəyi var.

“Mən belə başa düşdüm ki, yaxın vaxtlarda onların əsas vəzifəsi REAL Hərəkatının lideri İlqar Məmmədov da daxil olmaqla, bütün siyasi məhbusların azad edilməsinə nail olmaqdır”,  - N.Cəfərli bildirib.

Yeri gəlmişkən, həmməruzəçilər  N.Cəfərlinin özünə qarşı cinayət işindən də məlumatlı olublar.

O, absurd cinayət işi üzrə istintaq altındadır. İlkin yoxlama zamanı fəal tərəfindən qanun pozuntusu aşkar edilməsə, hətta ölkədən çıxışına qoyulan qadağa götürülsə də avqustda onu gözlənilmədən həbs ediblər. Sonradan həbsdən azad ediblər. Ancaq ondan Bakıdan çıxmamaq haqda iltizam alıblar.

Həmməruzəçilərin söylədiklərindən, həmçinin AŞ baş katibinin konkret İlqar Məmmədovun işi üzrə xüsusi missiya göndərməsindən belə çıxır ki, Strasburq “kürü diplomatiyası” nəticəsində təşkilatın pozulmuş imicinin bərpasına çalışır, N.Cəfərli vurğulayıb.

“Belə təəssürat yaranır ki, Avropa Şurasında və AŞPA-da “rebrendinq” – təşkilatın imicinin bərpası prosesi başlayıb. İtaliyalı deputat Luka Volontenin rüşvət alması məsələsi ilə bağlı hadisə AŞ-nin imicinə ciddi ziyan vurub”, - N.Cəfərli bildirib.

Onun sözlərinə görə, həmməruzəçilər bildiriblər ki, yaxın vaxtlarda Azərbaycana yenə gələcəklər. Çox güman ki, onlar AŞPA-nın aprel sessiyasına hesabat hazırlayacaqlar.

N.Cəfərlinin fikrincə, hesabatın qəbuluna qədər, martda - Novruz bayramı ərəfəsində siyasi məhbusları azad etmək üçün hakimiyyətin şansı var.—06B--