AŞPA-nın payız sessiyası öz işinə başlayır

Bakı/09.10.23/Turan: Strasburqda Avropa Şurası Parlament Assambleyasının (AŞPA) yay sessiyası işinə başlayır.

Oktyabrın 9-dan 13-dək  keçiriləcək sessiyada 2023-cü il Vatslav Havel İnsan Haqları Mükafatının verilməsi, eləcə də “Dağlıq Qarabağda humanitar vəziyyət” və “Osman Kavalanın dərhal azad edilməsinə çağırış” mövzusunda təcili debatların keçirilməsi tələbləri də müzakirənin əsas məqamlarından  biri olacaq.

 Avropa Şurasının 46 üzv ölkəsinin parlamentarilərini bir ayara gətirən Assambleyada “Pegasus” casus proqramları və digər oxşar proqram təminatı, gizli dövlət nəzarəti, eləcə də Rusiyanın indiki prezidentinin seçilmə sayının (mandatının) məhdudlaşdırılmasının hüquqiliyi və qanuniliyini araşdıran hesabatlar müzakirə olunacaq.

Həmçinin “Ukraynada ədalətli sülhün və Avropada davamlı təhlükəsizliyin təmin edilməsi” mövzusunda təcili prosedur çərçivəsində müzakirə və “Dənizdə miqrantların ölümləri” mövzusunda cari məsələlər müzakirəsi üçün müraciətlər edilib.

Parlamentarilər Avropa komissarı Didye Reynders ilə fikir mübadiləsi aparacaqlar. Latviyanın xarici işlər naziri, Nazirlər Komitəsinin sədri Krişyanis Karinş Avropa Şurasının icraedici orqanının işi haqqında məlumat verəcək.

Assambleyanın payız sessiyası çərçivəsində Rumıniyanın xarici işlər naziri Luminita Odobesku plenar iclasda çıxış edəcək və parlamentarilərin suallarını cavablandıracaq. Eyni zamanda, Avropa Şurasının Baş katibi Mariya Peyçinoviç Buriç ilə sual-cavab sessiyası keçirəcək. Avropa Şurasının icraedici orqanı olan Nazirlər Komitəsinin işi ilə bağlı hesabat və onunla bağlı sual-cavab sessiyası da nəzərdə tutulub.-16d-