AŞPA-nın qış sessiyası açılır

Bazar ertəsi Strasburqda AŞPA-nın qış sessiyası açılır. Yanvarın 31-dək davam edəcək sessiyada assambleyanın yeni prezidentinin seçilməsi gözlənilir. Fransalı deputat Jan Klod Minyon səlahiyyət müddətinin başa çatması ilə əlaqədar bu postu tərk edir.

AŞPA rəhbəri postuna mümkün namizədlərdən biri Lüksemburqdan deputat Enn Brassordur. 

Mövcud ənənəyə görə, AŞPA rəhbəri postunu növbə ilə assambleyadakı müxtəlif siyasi qrupların nümayəndələri tuturlar və bu qaydalara əsasən növbə Brassorun namizədliyini irəli sürən Liberal Demokratlar Alyansınındır. 

Lakin bu dəfə britaniyalı deputat Robert Valterin də namizədliyi irəli sürülüb. Bununla əlaqədar o, Avropa Demokratlar Qrupunun rəhbəri postundan istefa verib.

Gündəliyə Ukraynada vəziyyətlə bağlı təcili müzakirələr daxildir. Həmçinin Avstriyanın federal kansleri, hazırda AŞ Nazirlər Komitəsinə sədrlik edən Verner Fayman, Avropa parlamentinin spikeri Martin Şultsun çıxışları planlaşdırılıb. 

Bundan əlavə, AŞ baş katibi Turbörn Yanqland  və Avstriya XİN rəhbəri Sebastyan Kurz deputatların qarşısında çıxış edərək onların suallarını cavablandıracaq.

Bununla yanaşı AŞPA-da iqlim dəyişikliyi məsələləri, AŞ və Fələstin muxtariyyəti arasında əməkdaşlıq, insan hüquqlarının müdafiəsində beynəlxalq təşkilatların rolu müzakirə olunacaq.

Sessiyada azərbaycanlı deputatlar Səməd Seyidov, Rafael Hüseynov, Sabir Hacıyev, Rövşən Rzayev, Fazil Mustafa, Sahibə Qafarova, Sevinc Fətəliyeva, Qənirə Paşayeva, Fəzail İbrahimli, Elxan Süleymanlı və Aydın Abbasovdan ibarət nümayəndə heyəti iştirak edəcək.

AŞ institutlarının fəaliyyəti ilə tanışlıq məqsədilə sessiyaya Azərbaycandan bir qrup vətəndaş və gənc  fəallar, həmçinin jurnalistlər dəvət olunub.

Azərbaycanın hüquq müdafiəçilərindən ibarət nümayəndə heyəti də Strasburqdadır. Qrup AŞPA-nın və AŞ-nin digər qurumlarının diqqətini siyasi məhbuslar probleminə, ölkədə fundamental azadlıqlar – ifadə, birləşmə azadlığının pozulmasına yönəltmək niyyətindədir. —06D--