ATƏT-in Minsk Qrupu: İlham Əliyevin tənqidi bu ölkələrin rəhbərliyinə çatdırılacaq

Bakı/12.12.20/ Turan: Dekabrın 12-də görüş zamanı prezident İlham Əliyevin tənqidinə cavab olaraq fransalı həmsədr Stefan Viskonti deyib ki, həmsədr ölkələr son 28 ildə bacardıqları qədər öz mandatını icra etməyə çalışıblar. " Mən sizin maraqlı təkliflərini yüksək dəyərləndirirəm. Biz tərəflərin iradəsinə uyğun olan variantı tapmaq üçün bunun üzərində çalışacağıq. Mənim hökumətim atəşkəsi alqışlayır". Biz noyabrın 10-na gecən gecə əldə olunmuş razılaşmanın bütün müddəalarına çox müsbət yanaşırıq.  Siz də qeyd etdiniz ki, regiona qərəzsiz və kollektiv qaydada sabitliyin, rifahın gətirilməsi üçün tamamilə yeni bir vəziyyət yaranıb.  Bu, tam sizdən asılı olacaq. Bəli, bunun üçün yaxşı zəmin var. Mən, əlbəttə ki, sizin indi açıq şəkildə söylədiyiniz fikirləri öz hökumətimə məruzə edəcəyəm. Bakıda olmağımız, belə başa düşürəm ki, dəvət əsasında olub. Dəvət olmasaydı, mən gəlməzdim. Ola bilsin, bu missiyanın təşkilində, yazışmada qeyri-aydınlıq olub. Lakin mən bizi bu görüşdə qəbul etdiyinizə görə sizə təşəkkürümü bildirmək istəyirəm. Mən sözlərinizi lazımi qaydada prezidentimə və hökumətimizə çatdıracağam". 

ATƏT-in Minsk Qrupunun ABŞ-dan olan həmsədri Endrü Şofer bildirib ki, İlham Əliyevin sözlərini öz hökumətinə çatdıracaq. "Sizin söylədiyiniz sözlərə və açıq verdiyiniz bəyanata gəlincə, anlayırıq ki, hazırda yeni vəziyyət yaranıb. Hamımız anlayırıq və etiraf edirik ki, indi qarşımızda yeni reallıqdır. Siz öz mövqeyinizi açıqladınız və bir azdan biz hadisələrin sonra necə cərəyan edəcəyi ilə bağlı təfərrüatları müzakirə edəcəyik. Bilmək istərdim, siz gələcəyi, ümumiyyətlə, necə görürsünüz? Əsasən də Madrid prinsiplərində deyilir ki, xətlər və kommunikasiyalar açılsın, münasibətlər yenidən qurulsun, regionda bütün xalqlar üçün müsbət mühit yaradılsın. Əgər bunlar sizin mövqeyinizin bir hissəsidirsə, onda, fikrimcə, biz və ölkələrimiz buna nail olunmasında rol  oynaya bilər. Biz bunu sizdən eşitmək istərdik, gələcəkdə hansı addımları atmaq istəyirsiniz? Bildiyiniz kimi, bundan sonra, biz Yerevana gedəcəyik və digər tərəflə də eyni söhbəti aparacağıq”, - Şofer deyib. 

Rusiyanın Azərbaycandakı səfiri Mixail Boçarnikov bildirib ki, Rusiya əldə edilmiş üçtərəfli razılaşmanın iştirakçısıdır və həmin bəyanatın müddəalarının icrasına xüsusi önəm verir. “Fikrimcə, bu sənədin tam icrası üçün hələ görüləcək işlər var. Onlar sizin söylədiyiniz kimi, cənab prezident, insanların, yəni məcburi köçkünlərin öz yerlərinə qayıtmasına, bölgənin dinc yolla yenidən qurulmasına aiddir. Minsk Qrupuna gəldikdə, hökumətimiz hər zaman bu qrupun vacibliyini qeyd edib. Bu səbəbdən, biz iştirak etmişik və bu gün də qrupda iştirak edirik. Hesab edirəm ki, qrupun birgə mövqeyi bu yaxınlarda Minsk Qrupu həmsədrləri tərəfindən ifadə olunub. Bu sənəddə ümumi münasibət bildirilir və biz istənilən sahədə, eləcə də bu gün sizin söylədiyiniz kimi, yenidənqurma işlərinin icrasında bacara biləcəyimiz yardımdan çox məmnun olardıq", - M.Boçarnikov deyib. -0-