Azərbaycan ordusu sülh haqqında üçtərəfli sazişin həyata keçirilməsini təmin edir

Bakı/13.12.20/Turan: Erməni tərəfi Azərbaycanın azad edilmiş ərazilərində atəşkəsin pozulması ilə müşayiət olunan təxribatçı hərəkətlər törədib. Bu barədə Azərbaycan Müdafiə Nazirliyi məlumat yayıb. Azərbaycan Silahlı Qüvvələri tərəfindən adekvat cavab tədbirləri görülüb.

Hazırda atəşkəs rejiminə əməl edilir, dekabrın 12-də Azərbaycan Müdafiə Nazirliyi məlumat verib. Rəsmi mənbələrin məlumatına görə, bir azərbaycanlı hərbçi yaralanıb.

Qarabağlı siyasətçi Ayk Hanumyan Hadrut rayonunda Köhnə Tağlar (Xin Taxer) və Çalaqqala (Xsabert) kəndlərinin Azərbaycan ordusu tərəfindən götürüldüyünü bildirib. Azərbaycan tərəfindən əməliyyatda artilleriya tətbiq edilib, altı erməni yaralanıb. Dekabrın 12-də ermənilər Qarabağda Rusiya bazasının qarşısına toplaşıblar ki, "onların mövqeyini anlasınlar”... Bizmlə Rusiya komandanlığının müavini (general Muradov Qarabağda deyil) söhbət etdi. Komandan müavini əmin etdi ki, tərəflər vəziyyəti sabitləşdirmək barədə razılığa gəliblər...Bu ərazi müdafiə ordusu tərəfindən qorunurdu və orada Rusiya sülhməramlılarının mövqeyi yox idi. İndi əvvəlki mövqelərin bərpası üçün bütün səviyyələrdə danışıqlar gedir. Sabah saat 11:00-da xəbər öyrənmək üçün yenidən görüşəcəyik", - Hanumyan yazıb (Yerkramas).

Erməni hərbçilər Köhnə Tağları tərk edblər. Bunu “Kavkazskiy uzel”i müxbirinə Çalaqqala kənd erməni “administrasiyası”nın rəhbəri Aleksandr Avanesyan bildirib.

"Köhnə Tağlar kəndi (Azərbaycanca adıdır, “köhnə dağlar" deməkdir-Turan) azərbaycanlılar tərəfindən götürülüb, Çalaqqala kəndi (Azərbaycan adıdır "yarğandakı qala" deməkdir – Turan) isə hər tərəfdən mühasirəyə alınıb", -  o deyib və əlavə edib ki, "Rusiyanın sülhməramlı kontingenti öz postlunda dayanıb və vəziyyətə müdaxilə etmir".

Dekabrın 12-də N.Paşinyan Hadrutda vəziyyəti müzakirə etmək üçün Yerevanda təcili müşavirə keçirib.

Rusiya Müdafiə Nazirliyi Qarabağda baş vermiş insidenti təsdiqləyib və onu Azərbaycan və Ermənistan arasında atəşkəsdən sonra ilk silahlı insident adlandırıb.

Dekabrın 12-də prezident İ.Əliyev Hadrut rayonunda erməni silahlı qruplarının olması və sülh bəyanatının şərtlərinə tabe olmaması barədə Minsk Qrupunun həmsədrlərinə məlumat verib. O, ermənilərə xəbərdarlıq edib ki, əgər təxribatlara son qoymasalar, erməni ordusu darmadağın ediləcək.

Dekabrın 12-də baş verənlər Azərbaycan ordusunun təxribatlar törədən  və bu il 10 noyabr tarixli atəşkəs haqda üçtərəfli sazişə əsasən Azərbaycan ordusunun nəzarətinə keçən ərazini tərk etməkdən imtina edən yaraqlılara qarşı hərbi əməliyyat apardığını göstərir.

Dekabrın 1-də xəbər verilmişdi ki, Hadrut rayonunun Azərbaycanın nəzarətinə keçən kəndlərində bu sazişi yerinə yetirməkdən imtina edən erməni yaraqlılar qalıb.

Turan-ın əldə etdiyi məlumata görə, erməni yaraqlılar Çalaqqala (Xsaberd) və Köhnə Tağlar (Xin Taxer) kəndlərində fəaliyyət göstəriblər. Bundan əlavə, Dizapayt dağı, Kataro monastırı da onların nəzarəti altında qalıb. Sosial şəbəkədə erməni mənbəyə istinadən bildirilmişdi ki, silahlı ermənilər üç tərəfdən Azərbaycan qoşunları ilə əhatə olunub. Bu qrupların komandirləri Ayk Hanumyan, Qari Abraamyan, Angel Qalstyandır. --0--