ATƏT-in Minsk Qrupunun həmsədrləri Ermənistan-Azərbaycan münaqişə zonasında hərbi eskalasiyanı pisləyiblər

Bakı/19.05.17/Turan: ATƏT-in Minsk Qrupunun həmsədrləri İqor Popov (Rusiya), Stefan Viskonti (Fransa) və Riçard Hoqland (ABŞ) bəyanat yayaraq bu yaxınlarda atəşkəsin pozulmasını pisləyiblər və tərəfləri münaqişə zonasında eskalasiyanın qarşısının alınması üçün tədbirlər görməyə çağırıblar.

Minsk Qrupunun bir neçə etibarlı mənbədən topladığı məlumata görə, mayın 15-də Azərbaycan Silahlı Qüvvələri təmas xəttinə raket buraxaraq erməni tərəfinin hərbi texnikasını məhv ediblər.

Mayın 16-da axşam və mayın 17-də erməni silahlı bölmələri müxtəlif kalibrli minaatanlardan cavab atəşi açıb. Bu hərəkətlər hər iki tərəfdən atəşkəs rejiminin pozulmasıdır və narahatlıq üçün əsas yaradır, bəyanatda vurğulanır.

Həmsədrlər qeyd edirlər ki, son zərbələr, hətta itki və zərər barədə ziddiyyətli məlumatlar var. ATƏT-in Minsk Qrupunun həmsədrləri və ATƏT-in hazırki sədrinin şəxsi nümayəndəsi vəziyyət barədə daha ətraflı və dəqiq informasiya almaq üçün əlavə məlumatlar və təhlilin nəticələrini toplamaqda davam edir.

Xəbər verildiyi kimi, mayın 15-də cəbhənin Füzuli-Xocavənd istiqamətində Ermənistan Hava Hücumundan Müdafiə qoşunlarına məxsus "OSA" zenit-raket kompleksi hərbi qulluqçular tərəfindən müdafiənin ön xəttində yeni mövqeyə çıxarılıb və hava məkanını nəzarətə götürməyə cəhd göstərilib.

"Azərbaycanın uçuş aparatlarına yaranan real təhlükənin və düşmənin aktivliyinin qarşısını almaq məqsədilə Ermənistanın "OSA" zenit-raket kompleksi və nəqliyyat-doldurucu maşını atəşlə tam sıradan çıxarılıb, şəxsi heyəti məhv edilib", - mayın 15-də axşam Azərbaycan Müdafiə Nazirliyi bildirib.-0--