Avropa İttifaqı missiyasının rəhbəri Azərbaycan qadınlarına dəstək layihələri barədə

Bakı/10.03.23/Turan:  Avropa İttifaqı Azərbaycanda qadınlara fayda gətirən bir sıra layihələri dəstəkləyir. Bunu martın 9-da Avropa İttifaqının Bakıdakı nümayəndəliyinin rəhbəri Peter Mixalko "Qadın böyük qüvvədir!» sosial kampaniyasına həsr olunmuş tədbirdə bildirib. Kampaniya martın 1-də başlayıb və bir ay davam edəcək.

"Avropa İttifaqı müxtəlif sahələrdə çalışan 27 ilhamverici azərbaycanlı qadınla birlikdə Beynəlxalq Qadınlar Gününü qürurla qeyd edir. Biz Azərbaycanda qadınlara fayda gətirən bir sıra layihələri dəstəkləyirik və Avropa İttifaqı ilə Azərbaycan arasında möhkəm tərəfdaşlığa öz töhfəmizi veririk", - Mixalko deyib.

Bu sosial layihədə qadınlar təhsil, mədəniyyət və səhiyyə sahələrini təmsil edirlər, onların arasında iş adamları, vətəndaş cəmiyyətinin nümayəndələri və könüllülər var.

Ailə, Qadın və Uşaq Problemləri üzrə Dövlət Komitəsinin sədri Bahar Muradova qeyd edib ki, Avropa İttifaqının həyata keçirdiyi layihə və proqramlar həyatın bütün sahələrində qadınların tam iştirakına, həmçinin təhsil almaq və işə düzəlmək imkanlarının genişləndirilməsinə şərait yaradır.

"Qadın böyük qüvvədir!" kampaniyası çərçivəsində Avropa İttifaqı missiyası Azərbaycanın uğurlu qadınlarının hekayələrini bölüşür. Belə ki, tədbirdə sosial kampaniyanın elementlərinin təqdimatı ilə bağlı videoçarxlar nümayiş etdirilib, həmçinin Avropa İttifaqı tərəfindən maliyyələşdirilən layihələrin iştirakçıları və benefisiarların çıxışları olub.

Layihə iştirakçılarına və könüllülərə sertifikatlar təqdim olunub, xatirə fotoları çəkilib. 16B06