Avropa İttifaqı missiyasının rəhbəri və Gürcüstanın sabiq müdafiə naziri Muxtarlının oğurlanması haqqında

Bakı/03.06.17/Turan: "Biz baş verənlərlə bağlı narahatlığımızı bildiririk, prosesi diqqətlə izləyirik və inanırıq ki, araşdırma sona çatdırılacaq", bu barədə jurnalistlərə Avropa İttifaqının Gürcüstandakı nümayəndəliyinin rəhbəri Yanoş Herman Azərbaycanlı jurnalistin işini şərh edərkən bildirib.

"İnsan hüquqları müdafiəçiləri və jurnalistlərin Azərbaycanlı jurnalistlə bağlı ifadə etdikləri narahatlığa qoşuluram", deyə Herman qeyd edib.

Gürcüstanın sabiq müdafiə naziri Tina Xidaşeli hesab edir ki, Gürcüstan hökumətinin Muxtarlının işi haqqında bəyanatları "qətiyyən inandırıcı deyil".

"Mümkün deyil ki, ölkənin demokratiya iddiaları olsun və onun ərazisində insan oğurlansın, sonra vaxtilə siyasi təhlükə ilə əlaqədar qaçdığı ölkəyə aparılsın. Buna görə hökumət artıq dəlilləri dərc etməli, bu şəxsin yerdəyişməsi haqqında videomaterial yaymalıdır.

Hakimiyyətin bunda iştirak etməsi haqqında variant dəhşətdir, iştirak etməməsi və xüsusi əməliyyatı başqa ölkənin həyata keçirməsi variantı isə daha böyük miqyaslı dəhşətdir. Bu ölkənin əhalisi nə baş verdiyini bilməlidir və bunu edənlərin məsuliyyəti məsələsi qaldırılmalıdır", deyə Tina Xidaşeli bildirib. -02D-