Avropa İttifaqı Şurası Ermənistan və Azərbaycan arasında sülh əldə olunması üzrə səyləri dəstəkləyir

Bakı/27.10.23/Turan: 26-27 oktyabr tarixlərində Brüsseldə Avropa İttifaqı Şurasının iclası keçirilib. İclasın yekunlarına görə Brüsselin bir sıra beynəlxalq problemlərlə bağlı mövqeyini əks etdirən geniş sənəd qəbul edilib. 11 səhifəlik sənəddə Ukrayna və Yaxın Şərqlə yanaşı Cənubi Qafqazda vəziyyətlə bağlı bir abzas var. Burada belə deyilir:

"Aİ Şurası Ermənistan və Azərbaycan arasında suverenliyin, sərhədlərin pozulmazlığının və ərazi bütövlüyünün tanınmasına əsaslanan sabit və möhkəm sülhə daimi dəstəyini vurğulayır.

Aİ Şurası Qarabağ ermənilərinin, o cümlədən öz evlərinə qayıtmaq istəyənlərin hüquqlarının və təhlükəsizliyinin təmin edilməsinin vacibliyini qeyd edir.

Brüssel formatı vasitəsilə münasibətlərin normallaşması prosesini dəstəkləyir və tərəfləri bu prosesdə vicdanla iştirak etməyə və ilin sonuna qədər prosesi başa çatdırmağa çağırır".

Bundan başqa, Aİ Şurası Ermənistanla əməkdaşlığı gücləndirməyə çağırır. 02D