Avropa məhkəməsi Azərbaycanla bağlı iki qərardadını elan edib

Dekabrın 12-də Avropa İnsan Hüquqları Məhkəməsi Azərbaycanla bağlı iki qərardadını elan edib.

Şəxsi həyata hörmət hüququnun pozuntusunun mübahisələndirildiyi hər iki işdə tərəflər dostca razılaşıblar. Hökumət ərizəçilərə təzminat ödəyəcək.

“Elçin Sadıqov və Zibeydə Sadıqova Azərbaycana qarşı” işi insan hüquqlarının müdafiəsi, o cümlədən bu iki vəkilin mənzilində, ofisində və avtomobilində axtarışın aparılması və həbslə bağlı olub.

Dekabrın 12-də Avropa İnsan Hüquqları Məhkəməsi bildirib ki, tərəflər dostca razılaşıblar. Hökumət ərizəçilərin hər birinə 5 min avro maddi, mənəvi kompensasiya ödəmək öhdəliyi götürüb.

Avropa İnsan Hüquqları Məhkəməsinin digər qərardadında “Ayven Şamuradov Azərbaycana qarşı”  işi üzrə tərəflərin dostca razılaşma əldə etdikləri deyilir.

Bu iş üzrə ərizəçi təcridxanada saxlanıldığı müddətdə ailəsilə görüş və telefonla danışmaq, xarici aləmlə əlaqə hüququnun məhdudlaşdırılmasından şikayət edib. Şahmuradov Avropa İnsan Hüquqları Konvensiyasının 8-ci maddəsi ilə qorunan şəxsi həyata hörmət hüququnun pozulduğundan da şikayətlənib.

Tərəflərin razılaşmasına əsasən, hökumət ərizəçiyə 5 min avro kompensasiya ödəyəcək. Ərizəçini vəkil Cavad Cavadov təmsil edir.