Avropa Parlamenti Gürcüstanda keçirilmiş parlament seçkilərinin nəticələrini tanımır və "Gürcü Arzusu"na qarşı sanksiyalar tətbiq etməyə çağırır

Əhəmiyyətli pozuntulara görə Avropa Parlamentinin deputatları Gürcüstanda keçirilən son parlament seçkilərinin nəticələrini rədd edir və bir il ərzində seçkilərin təkrar keçirilməsini tələb edirlər. 

Bu barədə Avropa Parlamentinin cümə axşamı Gürcüstan barəsində qəbul etdiyi qətnamədə deyilir.

Aİ-yə namizəd ölkə olan Gürcüstanda keçirilən parlament seçkiləri nə azad, nə də ədalətli olub, bu da bu ölkədə davam edən demokratik geri çəkilişinin növbəti təzahürüdür. Buna görə hakim "Gürcü Arzusu" partiyası tam məsuliyyət daşıyır.
Avropa Parlamentinin deputatları çoxsaylı və ciddi seçki pozuntularını, o cümlədən seçicilərin hədələnməsi, səslərin manipulyasiyası, seçki müşahidəçilərinə və mediaya müdaxilə və elektron səsvermə maşınları ilə manipulyasiyaların qeydə alınması hallarını pisləyir.

Ölkənin Mərkəzi Seçki Komissiyası tərəfindən elan edilmiş səsvermənin nəticələri "gürcü xalqının iradəsinin etibarlı təzahürü deyil", deyə qətnamədə qeyd edilir.

Beynəlxalq ictimaiyyət və Avropa Parlamentinin deputatları seçkiləri hərtərəfli beynəlxalq nəzarət və müstəqil seçki administrasiyası tərəfindən bir il ərzində yenidən keçirməyə çağırır.

Aİ sanksiyalar tətbiq etməli və Gürcüstan hökuməti ilə rəsmi əlaqələri məhdudlaşdırmalıdır, deyə qətnamədə qeyd edilir.

Avropa Parlament Avropa İttifaqını və üzv dövlətləri Gürcüstanda seçki qanunvericiliyinin pozulmasına və sui-istifadələrə görə məsuliyyət daşıyan vəzifəli şəxslər və siyasi liderlər barəsində fərdi sanksiyalar tətbiq etməyə çağırır.

Xüsusilə baş nazir İrakli Kobaxidze, Tbilisi meri və "Gürcü Arzusu"nun baş katibi Kaxi Kaladze, Parlamentin spikeri Şalva Papuaşvili və keçmiş baş nazir və oliqarx Bidzina İvanişviliyə qarşı sanksiyalar tətbiq edilməlidir.

Avropa Parlamenti həmçinin Rusiyanın dezinformasiya vasitəsilə Gürcüstanda demokratik seçkilərə sistemli şəkildə müdaxiləsini qətiyyətlə pisləyib.