Avropa vətəndaş cəmiyyəti Azərbaycanda insan hüquqlarının pozulmasından narahatdır

Seçkilər sahəsində QHT-ləri birləşdirən Demokratik Seçkilər üzrə Avropa Platforması (EPDE) azad və demokratik seçkilərin keçirilməsi sahəsində tənəzzül, insan hüquqlarının kobud pozulması və vətəndaş cəmiyyəti fəallarının təqib olunmasından narahatlığını bildirib.

“Milli və beynəlxalq müşahidəçilər missiyasının məlumatlarına görə, oktyabrın 9-da Azərbaycanda keçirilmiş prezident seçkiləri zamanı seçici hüquqlarının kobud pozulması və kütləvi manipulyasiya halları qeydə alınıb. Odur ki, rəsmi nəticələr Azərbaycan xalqının iradəsini əks etdirmir”, - EPDE-nin bəyanatında deyilir.

“Azərbaycanda seçkilərdən sonra müstəqil müşahidə təşkilatlarına qarşı repressiyalar xüsusi narahatlıq doğurur”, - sənəddə deyilir.

“Platforma qurumun Koordinasiya Şurasının üzvü, Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədliyə və onun həmkarlarına qarşı  qanunsuz cinayət təqiblərinə etirazını bildirir. Onlar beynəlxalq donorların maliyyə dəstəyilə əlaqədar oktyabrın 31-dən istintaq altındadır. A.Məmmədli və digər dörd nəfər vətəndaş fəalına ölkə ərazisini tərk etmək qadağan olunub. 

“Biz hakimiyyətin belə hərəkətlərini prezident seçkiləri haqda müstəqil və düzgün rəyin ifadəsinə görə qisas aktı hesab edirik”, - bəyanatda vurğulanır.

Sonda Azərbaycan, Belarus və Rusiyada vətəndaş cəmiyyəti fəallarına təqiblərə son qoyulması, bütün siyasi məhbusların dərhal azadlığa buraxılması və onların tam reabilitasiyası tələb olunur.

Platforma demokratik hökumətləri avtoritar rejimlərlə əlaqələr zamanı insan hüquqları məsələsini önə çəkməyə çağırıb.

“Biz insan hüquqlarını pozan və vətəndaş cəmiyyətlərini təqib edən ölkəyə təzyiqləri davam etdirməyə çağırırıq. Biz həmçinin demokratik ölkələri insan hüquqlarına əməl etməyən  ölkələrdə vətəndaş cəmiyyətinə dəstəyi genişləndirməyə çağırırıq”, - bəyanatda deyilir.-02D-