AXCP-nin Gülənlə əlaqələrdə ittiham olunması yalan və təxribatdır

Xalq Cəbhəsi Partiyası (AXCP) partiya fəalı Fuad Əhmədliyə qarşı irəli sürülmüş Türkiyədə çevriliş cəhdinin təşkilində ittiham olunan Fətullah Gülənlə əlaqəsi olması ittihamını təkzib edib.

Dünən Azərbaycan Dövlət Təhlükəsizlik Xidməti (DTX) və Baş Prokurorluq dörd Azərbaycan vətəndaşının - mobil rabitə operatorları şirkətlərində işləyən, qanunsuz əməliyyat fəaliyyətində ittiham olunan Şahin İsrailov, Fuad Əhmədli, Etibar Musayev və Vüqar Qasımovun həbs edildiyi barədə məlumat yayıb. Onlar guya abunəçilərin şəxsi məlumatlarından və digər gizli məlumatlardan qanunsuz istifadə edirdilər. Faktla bağlı Cinayət Məcəlləsinin 302.1 (əməliyyat-axtarış fəaliyyəti haqqında qanunvericiliyi pozma) və 308.1 (vəzifə səlahiyyətlərindən sui-istifadə) maddələrilə cinayət işi açılıb.

AXCP-nin bununla bağlı bəyanatında deyilir ki, "hakimiyyət AXCP-yə qarşı məkrli plan quraraq, növbəti repressiya dalğasına başlayıb".

AXCP bəyan edir ki, Fuad Əhmədliyə qarşı irəli sürülən ittihamlar birmənalı şəkildə yalan və quramadır. Fuad Əhmədlinin Gülənçilərlə heç bir əlaqsə yoxdur və ola da bilməz. O, İqtisad Universitetini bitirib, müasir və liberal düşüncəli siyasi fəaldır.

AXCP-nin bəyanatında qeyd edilir ki,

hakimiyyət müxalifətin konstitusiyaya antidemokratik düzəlişlər üzrə refernduma qarşı hazırladığı mitinqlərdən qorxaraq növbəti repressiya dalğasına başlayır. Təsadüfi deyil ki, artıq bir neçə gündür AXCP üzvləri müxətlif uydurma bəhanələrlə saxlanılır və inzibati həbslərə məhkum edilir.

"Bütün əlamətləri ilə görünür ki, Azərbaycanda Şimali Koreya modelini bərqərar etmək ehtirası ilə yaşayan hakimiyyət öz pis niyyətinin qarşısında aşılmaz sədd kimi duran AXCP-yə qarşı repressiyanı davam etdirəcək. AXCP və onun sədrinə qarşı saxta Gülənçi ittihamına hətta Rusiya telekanallarının da qoşulması hakimiyyətin uzağa gedən məqsədlərindən xəbər verir. Məqsəd AXCP-ni zəiflədib, hakimiyyətin planları qarşısında sıradan çıxarmaqdır.

AXCP bəyan edir ki, bütün çətinliklərə rəğmən tutduğu haqq yolundan və prinsipial mövqeyindən geri çəkilməyəcək, mübarizəsini əvvəlki əzmkarlıqla davam etdirəcək", deyə məlumatda qeyd edilir.

AXCP yerli və beynəlxalq ictimaiyyəti Azərbaycanda başladılan yeni repressiya dalğasına biganə qalmamağa, etiraz səsini ucaltmağa, bu qeyri-bərabər mübarizədə Xalq Cəbhəsinin yanında olmağa və hakimiyyəti durdurmaq üçün təsir gücündən istifadə etməyə çağırır.

AXCP sədr müavini Gözəl Bayramlı Turan-a bildirib ki, Əhmədlidən başqa, DTX və Baş Prokurorluğun məlumatında adları çəkilən şəxslərin AXCP ilə əlaqəsi yoxdur.

O, həmçinin qeyd edib ki, Əhmədlinin evində axtarış zamanı Gülənlə bağlı heç bir ədəbiyyat müsadirə olunmayıb. Evdən bir neçə bədii ədəbiyyat və 1980-ci illərin sonlarında milli demokratiya hərəkatı dövrünə aid bir neçə kitabça götürülüb. -06B-