Türkiyə Parlamenti 20 mln. dollara İsraillə münasibətlərin normallaşmasını qəbul edib

Türkiyə Parlamenti İsraillə sülh sazişini təsdiq edib. Saziş 2010-cu ildə ölkələrin diplomatik münasibətləri kəsməsinə səbəb olan “Azadlıq Donanması” insidentində həlak olanların ailələrinə təzminat ödənilməsini nəzərdə tutur.

Türkiyə parlamentinin deputatları İsraillə sülh sazişinin təsdiq edilməsinin lehinə səs veriblər. Bu saziş 2010-cu ildə kəsilmiş diplomatik münasibətlərin tamamilə bərpa edilməsinə və qarşılıqlı olaraq səfirlərin göndərilməsinə yol açır. Xəbəri Anadolu agentliyi yayıb.

Sazişdə İsrailin 20 mln. dollar birdəfəlik təzminat ödəməsi nəzərdə tutulur. Bu məbləğ 2010-cu ildə “Azadlıq donanması” insidentində zərərçəkmişlərə veriləcək.

Müqaviləyə əsasən, İsrail vətəndaşları insidentə görə cinayət məsuliyyətinə və ya maddi məsuliyyətə cəlb olunmayacaqlar.

İki ölkə arasında münasibətlərin normallaşdırılmasını iyunun 27-də eyni zamanda Ankarada Türkiyə baş naziri Binali Yıldırım, Romada isə İsrail hökumətinin başçısı Binyamin Netanyaxu elan edib.

Həmin vaxt İsrailin baş naziri bildirib ki, Tel-Əviv Türkiyəyə Fələstin ərazisinə humanitar yardım göndərməyə, habelə orada infrastruktur layihələri həyata keçirməyə icazə verməyə razılaşıb. Netanyaxu qeyd edib ki, Qəzzə bölgəsinə yük yalnız İsrail limanları vasitəsilə daşına bilər, belə ki, “dəniz müdafiə blokadası” qalacaq. Yıldırımın sözlərinə görə, onun hökuməti üçün İsraillə siyasi və diplomatik münasibətlərin normallaşdırılması prioritetdir. Xüsusən, hər iki ölkə bir-birinə səfir göndərmək niyyətindədir. Fəalların başına gələn hadisədən sonra səfirlər geri çağırılmışdı.

“Azadlıq donanması” insidnti 2010-cu il mayın 31-də baş verib. Həmin vaxt İsrailin xüsusi təyinatlı qüvvələri “Mavi Marmara” gəmisinə hücum edib. İsrail əsgərləri Qəzzə bölgəsinə İsrail tərəfindən qoyulmuş blokadanı yarmağa çalışan onlarla türk fəalını qətlə yetirib. -02D-