AXCP-nin ofisinin yerləşdiyi binada qapıları və pəncərələri çıxarırlar (YENİLƏNİB)

Nərimanov rayonunun kommunal xidmət işçiləri dünənə qədər AXCP-nin ofisinin yerləşdiyi Tələt Şıxəliyev küçəsi, 8 ünvanında yerləşən ikimərtəbəli binanın qapı və pəncərələrini sökməyə başlayıblar.

AXCP sədr müavini Gözəl Bayramovanın Turan-a verdiyi məlumata görə, binanın özünə hələlik toxunmurlar, ikinci mərtəbədə pəncərələri, kondisionerləri və qapıları çıxarırlar.

Ətrafda ağır texnika yoxdur, çıxarılan qapıları yük maşınlarına yığırlar, deyə o bildirib.

Xatırladaq ki, dünən bu evin zirzəmisində qaz balonu partlayıb, daha sonra yanğın baş verib. Bundan sonra polis AXCP-dən ofisi boşaltmağı tələb edib. AXCP-nin sənədləri ofisdə qalıb. “Ev sahibinin gəlməsini gözləyirik və hələlik əşyaları çıxarmırıq”, deyə Bayramova bildirib.

Qeyd edək ki, binanın sahibi onu AXCP-yə kirayə verib, özü isə Türkiyədə yaşayır. Bu gün o, binada yanğınla əlaqədar Bakıya qayıdır. -02В-
 

2014 Mart 04 (Çərşənbə axşamı) 11:36:29

Çərşənbə axşamı səhər saatlarında Nərimanov Rayon Polis İdarəsinin əməkdaşları Xalq Cəbhəsi Partiyasının (AXCP) ofisinə gələrək binanın boşaldılmasını tələb ediblər. Bu haqda Turan-a AXCP Ali Məclisinin sədri Həsən Kərimli bildirib.

Onun sözlərinə görə, dünənki partlayışdan sonra Fövəqladə Hallar Nazirliyinin əməkdaşları binanın ətrafını lentlə mühasirəyə alıblar. Partlayışla bağlı bu gün FHN-in binada araşdırma aparması gözlənilir. H.Kərimov partiyadan binanın boşaldılması tələbini əsassız sayaraq bu tələbi hakimiyyətin AXCP-yə münasibətinin göstəricisi kimi dəyərləndirib.

O, tikintilə məşğul olan müstəqil ekspertlərin binada (Nərimanov rayonu, Tələt Şıxəliyev küçəsi, 8) baş vermiş partlayışla bağlı araşdırma apardıqlarını və əldə edilən nəticə barədə rəy verdiklərini söyləyib. H.Kərimov araşdırmanın nəticələri barədə açıqlama verməyib.

Xatırladaq ki, martın 3-də AXCP-nin ofisində partlayış baş verib. Araşdırma aparan FHN nümayəndələri bunu qaz sızması ilə əlaqələndirib, AXCP isə bunun təxribat olduğunu bildirir.-05B-