“Azel” TV saytının rəhbəri Əfqan Sadıqovu Gürcüstandan buraxmayıblar

İyulun 17-də “Azel” TV saytının rəhbəri Əfqan Sadıqovun Tbilisidən Ankaraya getməsinə icazə verilməyib. Onu sərhəd-pasport nəzarətində saxlayaraq geri qaytarıblar. Bu barədə Turan agentliyinə Sadıqov özü bildirib.

Sadıqovun sözlərinə görə, ona deyiblər ki, Azərbaycandan başqa heç bir ölkəyə gedə bilməz.

“Üçüncü ölkəyə giriş qadağasını kimin tətbiq etdiyini demədilər. Mənə təklif etdilər ki, izahat üçün Gürcüstan Daxili İşlər Nazirliyinə müraciət edim", - Sadıqov qeyd edib. O güman edir ki, qadağa Bakıdan qaynaqlanır.

"Bu, son vaxtlar mənim tənqidi yazılarım və videolarımla bağlıdır. Hazırda mənə qarşı cinayət işi yoxdur, amma bilirəm ki, Azərbaycana qayıdan kimi məni də digər tənqidçi jurnalistlər kimi həbs edəcəklər. Gürcüstanda məni və Azərbaycandakı qohumlarımı hədələyərək tənqidlərə son qoymağımı tələb etdilər. Ona görə də biz Gürcüstandan getmək istəyirik", - Sadıqov deyib.

O qeyd edib ki, 24 dekabr 2023-cü ildən Gürcüstanda yaşayır. Sadıqov Gürcüstana müalicə üçün gedib və təhdidlərə görə geri qayıtmayıb.

*Əfqan Sadıqov 2020-ci ilin mayında hədə-qorxuyla tələb etmə ittihamı ilə həbs olunub və 7 il müddətinə azadlıqdan məhrum edilib. O, ittihamı rədd edir. Hüquq müdafiəçiləri onu siyasi məhbus kimi tanıyıblar. 2023-cü ilin may ayında əfv edilib.