Azərbaycan Baş Prokurorluğu Dağlıq Qarabağda kürd terror təşkilatlarının cinayətlərini araşdırır

Bakı/13.11.20/Turan:  Baş Prokurorluq İraqda yaşayan PKK, PYD və YPG terror təşkilatlarının üzvləri tərəfindən Azərbaycan Respublikasına qarşı törədilən cinayət əməlləri, həmçinin Livan Respublikasının Vartkes adlı vətəndaşı və digərləri ilə bağlı materiallar əsasında araşdırma aparıb. Bu  barədə Azərbaycan Baş Prokurorluğunun mətbuat xidmətinin məlumatında deyilir. 

Araşdırmalar zamanı müəyyən edilib ki, İraq, Livan və Suriyanın müxtəlif yerlərində yaşayan həmin terror təşkilatlarına aid bir qrup şəxs Aslan Murad Vartanyanın, Bese Xozat və başqalarının çağırışı və Livan Karadağı, Hemaran Kervaçyan və Sarvat Baqopşinin rəhbərliyi ilə 2016-cı ilin mart-aprelində və 2020-ci ilin oktyabrında Azərbaycanın beynəlxalq aləmdə tanınmış dövlət sərhəddinə qanunsuz olaraq Ermənistan tərəfindən keçərək işğal edilmiş Dağlıq Qarabağa və digər ərazilərə daxil olub.

Onlardan Ermənistan hərbi-siyasi rejimi tərəfindən mülki əhaliyə qarşı muzdlu qismində və Azərbaycan Respublikası Silahlı Qüvvələrinin antiterror əməliyyatlarında iştirak edənlərə qarşı istifadə olunub.

İstintaqla həmçinin müəyyən edilib ki, adıçəkilən cinayətkar birliyin üzvləri Azərbaycan Respublikasının vətəndaşlarına qarşı yönəlmiş terror fəaliyyətində iştirak ediblər. Onlar hərbi sursat və hərbi texnikadan istifadə edərək mülki şəxslərə qarşı çoxsaylı cinayətlər törədib, ictimai təhlükəli fəsadlar və milli ədavət niyyətilə partlayışlar, yanğınlar və ya digər hərəkətlər törədiblər.

Faktlar üzrə Azərbaycan Respublikasının baş prokuroru tərəfindən 100.2-ci (təcavüzkar müharibənin aparılması), 120.2.1-ci (qəsdən qətl törətmək cinayətkar təşkilat və ya birlik tərəfindən), 318.2-ci (Azərbaycan Respublikasının dövlət sərhəddindən qanunsuz keçmə) maddələri və Azərbaycan Respublikası Cinayət Məcəlləsinin digər maddələri ilə cinayət işləri başlanıb, istintaqın aparılması Baş Prokurorluğun İstintaq İdarəsinə həvalə edilib.

Hazırda hər iki cinayət işi üzrə intensiv əməliyyat-istintaq tədbirləri davam etdirilir, məlumatda deyilir.—06D