Azərbaycan BMT Beynəlxalq Məhkəməsinin qərarını alqışlayır - XİN /YENİLƏNİB/

Bakı/07.07.23/Turan: 6 iyul 2023-cü il tarixində BMT-nin Beynəlxalq Ədalət Məhkəməsi İrqi Ayrı-seçkiliyin Bütün Formalarının Ləğv Edilməsi üzrə Beynəlxalq Konvensiyanın tətbiqi ilə bağlı Ermənistan Azərbaycana qarşı məhkəmə işi üzrə 22 fevral 2023-cü il tarixli Qərarında dəyişiklik edilməsi məqsədilə Ermənistanın 12 may 2023-cü il tarixli tələbini yekdilliklə rədd edib. Bu barədə Azərbaycan XİN-in məlumatında deyilir.

"Biz Məhkəmənin Azərbaycanın öz sərhədlərinə nəzarət etmək hüququnu bir daha təsdiq edən və Ermənistanın sərhəd nəzarət buraxılış məntəqəsinin aradan qaldırılması ilə bağlı tələbinin əsassız olduğunu sübut edən qərarını alqışlayırıq. Beləliklə, Ermənistan tərəfinin son qərarı yanlış şərh etməsi çıxılmaz vəziyyətdən fikri yayındırmaq cəhdindən başqa bir şey deyil.

Azərbaycanın Laçın yolunun girişində sərhəd nəzarət buraxılış məntəqəsi təsis etmək qərarı onun sərhədlərin mühafizəsi üzrə suveren hüququdur. Qeyd edilən çərçivədə, bu qərar Azərbaycanın təhlükəsizliyini və sülh perspektivlərini təhdid edən Azərbaycanın suveren ərazisinə qeyri-qanuni olaraq silah, hərbi texnika və hərbçilərin axınının dayandırılması zərurətindən irəli gəlirdi.

Bununla yanaşı, sərhəd nəzarət buraxılış məntəqəsi yaradılandan etibarən erməni əsilli yerli sakinlər Azərbaycanın daxili və beynəlxalq öhdəlikləri çərçivəsində giriş-çıxışda sərhəd nəzarətinin ayrı-seçkilik olmadan həyata keçirildiyi sərhəd buraxılış məntəqəsindən keçməkdədirlər.  

Azərbaycan Beynəlxalq Ədalət Məhkəməsinin Qərarını və beynəlxalq hüquqi öhdəliklərini yerinə yetirməkdədir. Azərbaycan Ermənistanın beynəlxalq hüququn davamlı şəkildə və tarixi ağır pozuntularına görə məsuliyyətə cəlb edilməsi istiqamətində bütün zəruri tədbirləri davam etdirəcək", deyə Nazirliyin məlumatında qeyd edilir. 0

*   *   *

2023 İyul 07 (Cümə) 14:59:23

BMT Beynəlxalq Məhkəməsi Ermənistanın Azərbaycan qoşunlarının Laçın yolundan çıxarılması tələbi yer alan iddiasını təmin etməyib

Bakı/07.07.23/Turan: BMT Beynəlxalq Məhkəməsi Ermənistanın Azərbaycan hərbiçilərinin Laçın yolundan çıxarılması və "Laçın" sərhəd-buraxılış məntəqəsi təsis edilməsinin qanunsuz hesab olunması tələbi yer alan iddiasını təmin etməyib, bu barədə Turan-a Azərbaycan XİN-dəki mənbə bildirib.

"BMT Beynəlxalq Məhkəməsi Ermənistanın 12 may 2023-cü il tarixli "Laçın" sərhəd-buraxılış məntəqəsinin qanunsuz hesab olunması və Azərbaycanın bütün silahlı şəxslərinin Laçın yolundan çıxarılmasının tələb olunması haqqında vəsatətini təmin etməyib", deyə mənbə qeyd edib.

Xatırladaq ki, Azərbaycan "Laçın" sərhəd-buraxılış məntəqəsini aprelin 23-də Həkəri çayı üzərindəki körpüdə qurub. 06В