Azərbaycan Demokratiya və Rifah Partiyası İranda etiraz edənlərin müdafiəsinə qalxıb

Bakı/27.09.22/Turan:  Azərbaycan Demokratiya və Rifah Partiyası hüquq müdafiəçilərini, azad mətbuatı, müstəqil vətəndaş cəmiyyətini və siyasi partiyaları İranda gənc qadın Məhsa Əmininin ölümündən qaynaqlanan  vətəndaş etirazlarına biganə qalmamağa çağırıb.

Partiyanın yaydığı bəyanatda deyilir ki, İranda mövcud siyasi rejim  40  ildən çoxdur ki, Cənubi Azərbaycanda soydaşlarımıza qarşı diskriminasiya,  assimilyasiya siyasətini həyata keçirir ki,  bu da son etiraz aksiyaları zamanı özünü açıq şəkildə nümayiş etdirib. “İran rejimi son  günlər insan hüquq və azadlıqlarının təmin olunması tələbilə ”Azadlıq,  ədalət, milli hökumət” şüarı ilə etiraz aksiyalarına qalxmış soydaşlarımıza qarşı həbsləri və qətliamı davam etdirir”.

Demokratiya və Rifah Partiyası Cənubi Azərbaycandakı bacı-qardaşlarımızın huquqları uğrunda mübarizə aparacağını, soydaşlarımızın “Azadlıq, ədalət, milli hökumət” çağırışını beynəlxalq birliyə çatdıracağını bəyan edir.

Partiya İrandakı siyasi rejimi insan hüquq və azadlıqlarına hörmətlə yanaşmağa, Cənubi Azərbaycanda yürüdülən milli diskriminasiya və assimilyasiya siyasətinə son qoymağa, qətliamları dayandırmağa çağırıb.—0—