Azərbaycan Dövlət Komissiyası itkin düşmüş əsgərlərlə bağlı beynəlxalq qurumlara müraciət edib

Bakı/13.04.23/Turan: Müdafiə Nazirliyinin iki əsgərinin - Aqşin Qabil oğlu Bəbirov (2004-cü ildə anadan olub)  və Hüseyn Əhliman oğlu Axundovun (2003-cü il) Naxçıvanın Ermənistanla sərhədində Şahbuz rayonunda itkin düşməsilə əlaqədar Əsir və itkin düşmüş, girov götürülmüş vətəndaşlarla əlaqədar Dövlət Komissiyası Azərbaycanın digər orqanları ilə birlikdə axtarış və araşdırma aparır. Bu barədə Dövlət Komissiyasının məlumatında bildirilir.

“Əsgərlərin Ermənistan ərazisində saxlanılması ehtimalı nəzərə alınaraq, onların azad olunması üçün aidiyyatı beynəlxalq təşkilatlara rəsmi müraciət edilib”, - məlumatda deyilir.

Qeyd edək ki, aprelin 10-da erməni tərəfi iki əsgərdən birinin saxlanıldığını təsdiqləyib.

Erməni tərəfinin iddiasına görə, xidmət yoldaşları əsgərləri incitdiyinə görə onlar Ermənistan tərəfə könüllü keçiblər. Bu barədə baş nazir Nikol Paşinyan bildirib. Onun dediklərinə görə, saxlanılanlardan biri  Azərbaycana qayıtmaq istəmədiyini bildirib  və Ermənistan onu təhvil vermək niyyətində deyil.

Aprelin 13-də günorta erməni tərəfi bildirib ki, ikinci azərbaycanlı əsgər də tapılaraq saxlanılıb.–06D-