Azərbaycan İrana sərt etiraz bildirib (yenilənib)

Yanvarın 1-də İranın Azərbaycandakı səfirliyinin müvəqqəti işlər vəkili Seyid Cəfər Ağayi Məryan Xarici İşlər Nazirliyinə çağırılıb.

Xarici İşlər Nazirliyinin məlumatında deyilir ki, görüş zamanı, 29 dekabr 2024–cü ildə Ərdəbildə İranın Ali rəhbərinin Ərdəbil vilayəti üzrə nümayəndəsi, Ərdəbilin imam cüməsi Seyid Həsən Amelinin iştirak etdiyi və İranın Radio və Televiziya Təşkilatının “Xəbər Şəbəkəsi” kanalında yayımlanan tədbirdə Azərbaycana və dövlət başçımıza qarşı səsləndirilən təhqiramiz ifadələrə görə İran tərəfinə sərt etiraz bildirilib.

“Bununla yanaşı, son zamanlar İranda əhali arasında açıq-aşkar şəkildə anti-Azərbaycan əhval-ruhiyyəsinin ciddi şəkildə qızışdırılması ilə əlaqədar narazılıq diqqətə çatdırılıb.

İranda anti-Azərbaycan propaqandasının ikitərəfli münasibətlərin ruhuna, ölkələrimiz qarşısında qoyulan məqsəd və vəzifələrə uyğun gəlmədiyi qarşı tərəfə bildirilib. Bu kimi hərəkətlərin ikitərəfli dövlətlərarası və insanlararası münasibətlərin qorunub saxlanılması və dərinləşdirilməsi əvəzinə, nifrət və düşmənçilik yaratmaq məqsədi daşıdığı qeyd olunub”, məlumatda qeyd edilir.

Azərbaycana qarşı bu kimi təxribatlara son qoyulması tələb olunub.

 Qeyd edək ki, iranlı Ayətullah Azərbaycan və Türkiyə liderlərinə qarşı təhqiramiz ifadələr işlədib, iki ölkənin tarixini təhrif edən açıqlamalar verib.

Orta Doğu Araşdırma Mərkəzinin rəhbəri Sədrəddin Soltan Amerikanın Səsinə deyib ki,  İranın Ali rəhbərinin Ərdəbil vilayəti üzrə nümayəndəsi, Ərdəbilin imam cüməsi Seyid Həsən Ameli Azərbaycana qarşı səsləndirdiyi fikirlər ilk dəfə deyil.

“Həmas İsrailə  hücum edəndən sonra  İran hakimiyyəti özünə tərəfdaşlar toplamaq üçün  mütəlif vasitələrdən istifadə elədi. Əvvəl ümumi çağırışlar elədi. Özünə tərəfdaş toplaya bilməyəndə  şantaja keçdi. Başladı Azərbaycanı və Türkiyəni şantaj etməyə. Guya İsrail təyyarələri  Azərbaycan nefti ilə işləyir. Azərbaycan ,  Türkiyə İsraill ilə  bütün əlaqələri kəsməlidir. Başladı bu ölkələrə dərs verməyə. Seyid Həsən Ameli bu təbliğatın  başçılarından idi”, o deyib.

Sədrəddin Soltan  deyir ki, Suriyada dekabrın 8-də Bəşər Əsəd rejimi süquta uğrayandan sonra Tehran hakimiyyəti  qonşularına qarşı  bir az  da sərtləşib.

Onun fikirncə Azərbaycan və Türkiyənin Suriyada  birgə fəaliyyət göstərməsi barədə bəyanatlar , Azərbaycanın Suriya ilə diplomatik  münasibətləri bərpa etmək və s bu tip məsələlər də Tehranı qıcıqlandırır.

“Ona görə də Tehran hakimiyyəti bu dəfə başqa  formada məsələyə girişir. Bu nədir ? Azərbaycan və Türkiyə arasında - Səfəvi və Osmanlı arasında olan müəyyən anlaşılmazlığı  günümüzə daşımaqdır. Azərbaycan və Türkiyə arasında ixtişaş yaratmaq, bir-birinə qarşı nifrət  hissi oyatmaq  istəyir. Tehran hakimiyyəti bir il bundan qabaq  Haması  müdafiədə dünya müsəlmanlarını  birliyə çağırırdısa, bu gün Tehran hakimiyyəti Azərbaycan və Türkiyə arasında “təriqətlərarası” məsələləri gündəmə gətirir və ziddiyyət yaratmaq istəyir” ,Sədrəddin Soltan  bildirib.

Ekspert deyir ki, Ərdəbildəki  toplantıda bununla yanaşı  Azərbaycan rəhbərlərinə qarşı  çıxışlar edilib və bu İran televiziylarında canlı yayılıb.

“Hətta bu tədbirin keçirilməsi  ilə bağlı elan, anons İranın rəsmi agentliklərində verilib. Bu onu göstərir ki, Tehran hakimiyyəti nə qədər münasibətləri normallaşdırılmasını istəsə də Rəsmi Bakı bir o qədər sonrakı mərhələdə yenə səhvlərini davam etdirir.  Niyə ? Çünki Tehran hakimiyyəti nə msəlmanla müsəlmandır, nə türklə türkdür, nə də normal qonşudur. Tehran hakimiyyəti panfarsizim,  şovinizmlə idarə olunan bir rejimdir. Ərdəbildəki keçirilən tədbir də Tehran hakimiyyətinin Azərbaycana , Türkiyəyə qarşı ənənəvi ideoloji davranışının məntiqi nəticəsidir”, ekspert əlavə edib.

* * *

Azərbaycan İrana sərt etiraz bildirib

Yanvarın 1-də İranın Azərbaycandakı səfirliyinin müvəqqəti işlər vəkili Seyid Cəfər Ağayi Məryan Xarici İşlər Nazirliyinə çağırılıb.

Xarici İşlər Nazirliyinin məlumatında deyilir ki, görüş zamanı, 29 dekabr 2024–cü ildə Ərdəbildə İranın Ali rəhbərinin Ərdəbil vilayəti üzrə nümayəndəsi, Ərdəbilin imam cüməsi Seyid Həsən Amelinin iştirak etdiyi və İranın Radio və Televiziya Təşkilatının “Xəbər Şəbəkəsi” kanalında yayımlanan tədbirdə Azərbaycana və dövlət başçımıza qarşı səsləndirilən təhqiramiz ifadələrə görə İran tərəfinə sərt etiraz bildirilib. 

“Bununla yanaşı, son zamanlar İranda əhali arasında açıq-aşkar şəkildə anti-Azərbaycan əhval-ruhiyyəsinin ciddi şəkildə qızışdırılması ilə əlaqədar narazılıq diqqətə çatdırılıb.

İranda anti-Azərbaycan propaqandasının ikitərəfli münasibətlərin ruhuna, ölkələrimiz qarşısında qoyulan məqsəd və vəzifələrə uyğun gəlmədiyi qarşı tərəfə bildirilib. Bu kimi hərəkətlərin ikitərəfli dövlətlərarası və insanlararası münasibətlərin qorunub saxlanılması və dərinləşdirilməsi əvəzinə, nifrət və düşmənçilik yaratmaq məqsədi daşıdığı qeyd olunub”, məlumatda qeyd edilir.

Azərbaycana qarşı bu kimi təxribatlara son qoyulması tələb olunub.